स्वनिगलय् आइसोलेसनया व्यवस्था
जुजुमान महर्जन
 
 
कोरोना भाइरस (कोभिड–१९)या संक्रमित जूपिनिगु ल्याः अप्वया वनाच्वंगुलिं थनया मनूत चिन्तित जुजुं वनीगु स्वभाविक खः । थुगु इलय् नाकाय् कडा जाँच यानाः जक स्वनिगः दुकाय्गु खँ जोरडारकथं न्ह्यःने हयाच्वंगु दु । थुकियात प्रभावकारी ढंग कार्यान्वयन याय्मफयाच्वंगु इलय् स्थानीय सरकारं कोरोना संक्रमित खनेदुथाय् सिल याय्गुलिसें कन्ट्याक्ट ट्रेसिङ याय्गु ज्या जुयाच्वंगु दु । थजाःगु अवस्थाय् स्वनिगः विशेष यानाः येँया अप्वः धइथें थाय् सिल जुजुं वनाच्वंगु दुसा थ्यंमथ्यं लकडाउनया अवस्थाय् वनाच्वंगु दु ।
 
सामाजिक दूरी कायम याय्गु, मास्क तय्गु, सेनिटाइजरया छ्यलाबुलालिसें आपालं सावधानी नालाच्वंगु खनेदुुसां न्हियांन्हिथं स्वनिगलय् कोरोना संक्रमित जूपिनिगु ल्याः झन्झन् अप्वया वनाच्वंगु दु । थुकिया नितिं स्वनिगःया स्वंगुलिं जिल्ला प्रशासन ज्याकुथिपाखें निर्देशिका पत्र हे जारी यानाः निषेधित ज्याया धलः हे पित बियाः उकियात पालना मयाःसा कडा कारवाही याय्गु ख्याच्वः तकं बीगु ज्या जुइधुंकूगु दु ।
 
उकियात कार्यान्वयन याय्गु ज्याय् पलाः न्ह्याकाच्वंगु दु, तर गुलितक ताः लाइगु खः, अले स्वनिगःबासीपिन्सं गुलितक साथ बीगु खः, व स्वय् ल्यंदनि । तर थ्व खँ सत्य खः कि स्वनिगलय् कोरोना संक्रमित जूपिनिगु ल्याः अप्वया वँवं अस्पतालया बेड अभाव जुजुं वनाच्वंगु दु । थुकियात कयाः स्वास्थ्य मन्त्रालयं बेडया अभाव जूगु खँ न्ह्यथसें निजी अस्पतालय् स्वीकृति कयातःगु बेडया स्वब्वय् छब्व कोरोना संक्रमितपिनिगु नितिं फ्याय्माःगु निर्देशन जारी याःगु दु ।
 
अथे हे छुं नं अस्पतालय् कोरोना संक्रमित लुल धाःसा मेमेगु अस्पतालय् रिफर मयासे सरकारं बियातःगु मापदण्डया नालाः उगु हे अस्पतालय् उपचार याय्माःगु नं न्ह्यथंगु दु । थ्व छगू बांलाःगु पक्ष खः । तर स्वनिगलय् अप्वया वनाच्वंगु कोरोना संक्रमितया दर स्वय्बलय् वासः याय्गु जक मखु, आइसोलेसनय् तय्त तकं स्वनिगलय् तःधंगु समस्या वइगु निश्चित खनेदु । थजाःगु अवस्था स्वनिगःया हालत छु जुइ धइगु अनुमान यासें याकनं हे आइसोलेसनया व्यवस्था याय्माःगु खनेदु । स्वनिगलय् ततःधंगु अस्पताल दुसां नं कोरोना ल्वगिपिनिगु नितिं पर्याप्त मात्राय् बेड मदु ।
 
थजाःगु अवस्थाय् केन्द्र, संघीय व स्थानीय सरकारं याकनं हे विकल्प मालेमाःगु खनेदु । थुकिया नितिं दकलय् न्हापां कोरोना संक्रमित जूपिन्त रोगया अवस्था स्वयाः वर्गीकरण याय्माःगु व भेन्टिलेटरय् हे तय्माःपिन्त अस्पताल भर्ना याय्गु याय्माः । तर आइसोलेसनय् तयाः वासः याय्माःपिनिगु नितिं थौंकन्हय् स्कूल चलय् मजूगु हुनिं ततःधंगु सुविधायुक्त ब्वनेकुथियात छ्यलेफइ । स्वनिगलय् धाय्गु खःसा बांलाःगु लकस दुगु नापं कम्पाउण्ड दुगु यक्व हे ततःधंगु ब्वनेकुथि दु ।
 
अथे हे, दय्कूगु इलय् तसकं बय्बय् जूगु येँया मांकाःद्यः (तिंख्यःया महाकाल द्यः) न्ह्यःने च्वंगु आर्मी अस्पतालयात नं छ्यलेफइ । ब्यापारिक दृष्टिकोणं दय्कातःगु उगु भवन न्हापा ला अस्पताल अथेहे नर्सिङ कलेजया नितिं हे छ्यलातःगु खः । अथे हे स्थानीय सरकारया इनापपाखें थजाःगु यक्व हे थाय्यात छ्यलेफगु अवस्था दु । तर थुकिया नितिं समन्वय जक माःगु खः । थजाःगु महामारीया अवस्थाय् थजाःगु चिचीधंगु खँय् जक व्यवस्थापन याय्फत धाःसां नं महामारीया विकराल समस्यापाखें बचय् जुइफइगु खँय् निगू मत मदु । थुकिया नितिं केन्द्र, प्रदेश व स्थानीय सरकारं इलय् हे बिचाः यानाः पलाः न्ह्याकेमाःगु थौंया आवश्यकता नं खः ।