स्वनिगलय् निषेधाज्ञा छ्वासूल
लहनान्यूज | बछलाथ्वः द्वादशी ११४१, असार ८ गते मंगलबाः
कोरोना भाइरस संक्रमण नियन्त्रणया नितिं स्वनिगःलय् न्ह्यागु निषेधाज्ञा थौं निसें छुं छ्वासूगु दु ।
स्वनिगःया ३गू जिल्ला (येँं, यलः व ख्वपः)या प्रमुख जिल्ला अधिकारीतये आइतबाःया मुँज्यां छुं प्रतिबन्धयात छ्वासुका छवाया निषेधाज्ञा न्ह्याकेगु निर्णय याःगु खः । थौं निसें न्ह्याइगु निषेधाज्ञाया न्हूगु झ्वलय् चिधंगु सवारी ज्वलंयात जोरविजोर प्रणाली लागू याना न्ह्याकेगु अनुमति बिउगु दु । अथेहे छुं तप्यंक स्वापू जुइगु व भिडभाड जुइगु बाहेकया व्यवसाय तकं पालंपाः याना सञ्चालन जुइ ।
डिपार्टमेन्ट स्टोर्स, सपिङ मल, खेलकुद ज्वलं, वसः कापः, लाकां, फेन्सी, कस्मेटिक, साडी, गिफ्टया पसः, टेलरिङ सोमबाः, बुधबाः व शुक्रबाः सुथय् ११ता ई निसें न्हिने ४ ता ई तक्क न्ह्याइ दइगु याना आदेशय् न्हूगु व्यवस्था याःगु दु । लुँ वहःया पसः, भाँडा, भुतुलिइ छ्यलिगु ज्वलं, विद्युतीय, घरायसी ज्वलं, अटोमोबाइल, शोरुम अटोमोवाइल पार्टस् पसः, इलेक्टोनिक्स पसः आइतबाः, मंगलबाः व बिहीबाः सुथय् ११ता ई निसें न्हिने ४ ता ई तक्क चायेके दइ ।
भिडभाड जुइगु फुक्क ज्यापहःलय् रोक तःगु वंगु दिंया व्यवस्था कायम हे जूगु दु । बँ पसः व चकं थासय् जुइगु व्यापारयात न रोक तःगु दु । नित्यकर्म बाहेकया धार्मिक ज्याझ्व नं संचालन यायेदइमखुसा भौतिक उपस्थितिइ पठनपाठन यायेगुलिइ नं रोक तःगु दु ।
थ्वहे दथुइ येँं, यलः व ख्वपः जिल्ला प्रशासन ज्याकुथिं फुक्क सेवा सञ्चालनय् हःगु दु । जनस्वास्थ्य सम्बन्धी मापदण्ड पालना याना थ्वयान्ह्यः लिछ्यागु सेवा थौं निसें हाकनं संचालन जूगु खः । कोरोना महामारी अप्वयेधुंका थ्वयान्ह्यः जिल्ला प्रशासन ज्याकुतयेसं अत्यावश्यक बाहेकया फुक्क सेवा लिछ्यागु खः ।
थौं निसें प्रशासन ज्याकुथिइ न्हूगु नागरिकता, नागरिकताया प्रतिलिपी, नाबालक म्हसिकापौ, राहदानी वितरण व सिफारिस सेवा न्ह्यागु दु । अथेहे ल्वाभः दर्ता व नवीकरण, संघसंस्था दर्ता व नवीकरण, पत्रपत्रिका दर्ता व मेगु सिफारिस नं चायेकुगु दु ।
स्वनिगः पिनेया हकय् बार फ्याना पालिकातयेत नियमित सेवा चूलाकेत सहजीकरण याःगु जिल्ला प्रशासन ज्याकुतयेसं न्ह्यथंगु दु । अप्वः धैथें जिल्ला प्रशासन ज्याकुतयेसं निषेधाज्ञा थप छ्वासुकायंकुगु दु । आः ७५ गू जिल्लाय् निषेधाज्ञा न्ह्यानाच्वंगु दु ।
Categorized in राष्ट्रिय
