स्वन्ति नखःनापं न्हूदँ ११३८या भिन्तुना
जुजुमान महर्जन
नेपाल सम्बत् ११३८ झीगु लुखाखलुइ वयाच्वंगु दु । न्हूदँ हरेक ब्यक्तिया नितिं विशेष जुयाच्वनीगु खःसा सुं ब्यक्ति विशेषया नामं मजूसे नेपाः देशया नामं नीस्वनातःगु नेपाल सम्बत् नेवाःतय्गु नितिं जक मखु, समग्र नेपाः देशया नितिं हे विशेष जुयाच्वनीगु खः ।
तर नेपाः देशया नामं नीस्वनातःगु नेपाल सम्बत् केवल नेवाःतय्गु नितिं जक विशेष जुयाच्वंगु दुसा थुकियात नेपाःया मौलिक सम्बत्, देशया नामं नीस्वनातःगु सम्बत् धाःसां नं नेपाः देय् अले फुक्कसिगु नितिं विशेष जुयाच्वनेफूगु मदु ।
नेपाल सम्बत्यात राष्ट्रिय सम्बत्कथं मान्यता बीमाः धकाः थ्वय्का वयाच्वंगु सःयात छुं छुं सरकारी पक्षं कार्यान्वयन याःसां नं थुकियात कयाः पूवंक हे कार्यान्वयन याय्गुपाखे धाःसा न्ह्याबलें लिचिलाच्वंगु खनेदु । न्हूदँ हनेगु झ्वलय् येँ, यल, ख्वपय् तःजिक सभा समारोह याइ, उगु सभाया सरकारया विशिष्ट ब्यक्तित्वपिनिगु नं उपस्थिति दइगु जक मखु, उमिसं नेपाल सम्बत्यात
छ्यलाबुलाय् हय्गु नितिं प्रतिबद्धता प्वंकी, तर उकियात कार्यान्वयन याय्गुपाखे धाःसां गबलें न्ह्यच्यूगु खनेमदु वा कार्यान्वयन याकेगु पक्ष धाःसा न्ह्याबलें छ्वासुया हे च्वनीगु खः ।
थ्व हे झ्वलय् थगुने थें थुगुसिया न्हूदँ समारोह समितिपाखें नेपाल सम्बत्यात सरकारी पक्षं कार्यान्वयन याकेगु खँय् बः बियाः नारा पितब्यूगु दु । थ्व आन्दोलनया निरन्तरता जुइफु, तर थ्व गनतक न्ह्याःवनीगु धइगु खँ धाःसा आः थथे हे धाय्फूगु मदुनि । छाय्धाःसा थुगु सम्बत्यात कयाः यक्व हे च्वछाःसां थुकियात छ्यलाबुलाय् हय्गु नितिं सरकारी पक्ष न्ह्याबलें उदासिता क्यना हे च्वंगु खायुगु यथार्थ खःसा नेवाःतय्गु आन्दोलन मात्र दच्छिइ छक्वः हे जकय् सीमित जुयाच्वंगु दु ।
न्हूदँ समारोह समितिइ सरकारया विशिष्ट ब्यक्तित्वपिन्सं न्ववानावंगु अझ धाय्गु खःसा यानावंगु प्रतिबद्धतायात कयाः तकं कार्यान्वयन याकेगु नितिं पलाः न्ह्याकूगु खनेमदु । छुं छुं पलाः ल्ह्वनेत कुतः याःगु जुइ, तर निरन्तरता धाःसा बी फयाच्वंगु मदु । अझ धाय्गु खःसा दुग्यंक गुगु च्यूताः तय्माःगु खः, व खनेदयाच्वंगु मदु ।
नेपाल सम्बत् नेवाःतय्गु जक सम्बत् मखु, समग्र नेपाः देय्या हे सम्बत् खः, थुकी निगू मत मदु । थुकथं हे ब्याख्या नं याना वयाच्वनागु दु, तर आःतक नं व्यवहारय् स्वय्गु खःसा नेवाःतय्गु हे जक सम्बत् जुयाः न्ह्यःने वयाच्वंगु दु ।
न्हूदँया लसताय् झीथाय् जक मखु, समग्र हलिमय् हे थःथःगुकथं हनीगु अस्वभाविक मखु । उकिं झीसं नं न्हूदँया लसताय् थीथी ज्याझ्वः यानाः हनावयाच्वंगु दु । न्हूदँ समारोह समितिपाखें दच्छियंकया याय्माःगु ज्याझ्वः तयार यानाः हे थःगु ज्या न्ह्याका वयाच्वंगु नं दु । तर झीगु लक्ष्य धइगु न्हूदँ हनीगु जक मखु, न्हूदँ हनेगु नापनापं नेपाल सम्बत्यात सरकारी ज्याखँय् छ्यलाबुलाय् हय्गु खः ।
थुकिया नितिं झी न्ह्यज्याय्माःगु खः । उकिं मेमेपिन्सं हनीगु न्हूदँ व झीसं हनीगु न्हूदँया ज्याझ्वः फरक खः, जुइमाः ताकि झीगु लक्ष्य पूवंकेगु नितिं न्ह्यज्याय्माःगु खः, गुकी दँय्दसं व हे नारा ज्वनाः न्ह्यज्याय्गु मखु । उकिं थुगुसिया न्हूदँपाखें सकल नेवाःतय्त झीसं याना वयाच्वंगु आन्दोलनयात तिबः बीकथंया ज्याझ्वः न्ह्याकेगुकथं प्रेरणादायी जुइमाः ।
झीके दयाच्वंगु कमि कमजोरीयात चीकाः नेपाल सम्बत्यात सरकारी ज्याखँय् छ्यलाबुलाय् हय्गु कथंया पलाः न्ह्याकेफय्माः धासें स्वन्ति नखः व नेपाल सम्बत् न्हूदँ ११३८या लसताय् “लहनान्युज” परिवारपाखें सकलसित यक्व यक्व भिन्तुना देछाना च्वना ।
