स्वन्ति नखःया झ्वलय् थौं सकलसिया छेँय् छेँय् लक्ष्मीपूजाया स्वां क्वकायेगु ज्या जुयाच्वंगु दु ।

वंगु कार्तिक कृष्ण औंशी अथे धायेबलय् कौलागा आमैया दिनय् लक्ष्मीद्यःया पूजा याःगु कुथिइ स्वां थौं क्वकायेगु याइ । छेँया हामां विधिकथं कलश स्वनाः, लक्ष्मी द्यः स्थापना यानाः पूजा यानातःगु लक्ष्मी द्यःया स्वां थौं क्वकायेगु याइ ।

छेँ, कुलया सम्पत्तिया भ्वं तकं पूजा यानातःगु लक्ष्मी पूजाया स्वां थौं म्ह्याय्मचा वयाः क्वकायेगु याइ । बियाछ्वयेधुंकूगु हे जूसां म्ह्याय्मचा थःछेँय् वयाः स्वां क्वकाःवइ । थुकियात बियाछ्वयेधुंकूम्ह म्ह्याय्मचाया नं थःछेँय् जिम्मेवारी दयाच्वनी धइगु दर्शन व शिक्षाकथं विद्वानपिन्सं व्याख्या यानातःगु दु । म्ह्याय्मचां स्वां क्वकयाः व हे स्वांलिसें प्रसाद छेँया सकल परिवारयात इनाबीगु याइ ।

थ्वयां न्ह्यः म्हिगः सकलसिया किजापूजा याःगु खः । लः व चिकंलिसें पोताय् व अभिरं छाय्पियाः उकी आखय्, मुस्या, ताय् आदि नं तयाः मन्दः दयेकाः तताकेहेँपिन्सं दाजुकिजायात किजापूजा याःगु खः । नेवाःतय् किजापूजा यायेबलय् तताकेहँेनं थः दाजुकिजायात ख्येँय् सगंलिसें भोगत्या, तःसि, स्यांगुलि नं तयाः सि सगं नं बीगु याइ ।

नेवाःतय् सि सगं बीगु धइगु थ्वहे स्वन्तिया इलय् जक खः । किजापूजा यायेगु झ्वलय् दाजुकिजायात गबलें झ्वाः मजुइगु ग्वय्स्वांया स्वांमाः नं क्वखायेका बी । किजापूजा याःम्ह किजायात चिकं मन्दः मगंतल्ले, तःसि पू मजूतल्ले, ख्वःसिंया ख्वला ध्वमगीतल्ले अले ग्वय्स्वां झ्वाः मजूतल्ले यमराजं यंके मदइगु वरदान ततां कयातःगु किम्वदन्ति समाजय् प्रचलित दु ।

Categorized in राष्ट्रिय