स्वास्थ्य दर्पण हेल्थ अवार्ड लःल्हात
नृपेन्द्रलाल श्रेष्ठ | चिल्लागा चौथी ११३९ (मार्च २४ २०१९)
स्वस्थ्य दर्पण मिडिया नेटवर्कया प्रस्तूती नेपाल टेलिभिजन प्लसपाखें प्रशारण जुयाच्वंगु स्वास्थ्य दर्पण टक शो ज्याझ्वः न्हय्दँ क्यंगु लसतय् स्वास्थ्य दर्पण हेल्थ अवार्ड लःल्हायेगु ज्या शनिवाः जूगु दु ।
चितवनय् स्थापना यानातःगु उगु मिडिया नेटवर्कया अध्यक्ष नापं स्वास्थ्य दर्पण ज्याझ्वःया परिकल्पनाकार, निर्माता नापं संचालक सन्दिप श्रेष्ठया सभापतित्वय् उगु ज्याझ्वः जूगु खः ।
येँया नेपाल प्रज्ञाप्रतिष्ठानय् जूगु उगु ज्याझ्वलय् सांसद एवं नेपाली कांग्रेसया महामन्त्री डा. शशांक कोइराला मूपाहां जुयादीगु खः । अथे हे विशिष्ट पाहां कथं पुलांम्ह स्वास्थ्य तथा जनसंख्यामन्त्री डा. बंशिधर मिश्र, नेपाल पत्रकार महासंघया महासचिव रमेश विष्ट नापं थीथी ब्यक्तित्वपिं पाहां जुयादीगु उगु ज्याझ्वलय् चिकित्सकत, संचारकःमित, समाजया थीथी ब्यक्तित्वपिं सहभागी जुयादीगु खः ।
ज्याझ्वलय् स्वास्थ्य दर्पण अवार्ड कथं न्हय्गू हे प्रदेशया न्हय्म्ह नापं याना गुम्ह चिकित्सकपिं प्रा.डा. संजिवकुमार शर्मा, डा. शयाम सुन्दर दास, डा. मदनकुमार पिया, प्रा. डा. श्यामराज रेग्मी, प्रा. डा. भरतबहादुर खत्री, डा. सुरेशकुमार कनौडिया, डा. नरिेश थापा, डा. चन्द्रप्रकाश पाण्डे, डा. अजय न्यौपानेयात लःल्हाःगु खः ।
अथे हे हेल्थ अवार्ड स्वास्थ्यकर्मी कृष्णप्रसाद रिजाल व गोविन्द नेपालयात लःल्हाःगु खः । उगु हे कथं स्वास्थ्य दर्पण हेल्थ अवार्ड पत्रकार अतुल मिश्र, पवनराज जोशी, दिपक दाहाल, पुरुषेत्तम घिमिरे, कल्पणा आचार्य व उद्धवराज भेटवालयात लःल्हाःगु खः ।
ज्याझ्वलय् मूपाहां सांसद कोइराला, विशेष पाहां पुलांम्ह स्वास्थ्य मन्त्री मिश्र, पत्रकार महासंघया महासचिव विष्ट, फोनिजया महासचिव मनोज घर्तिमगर, नेवाः पत्रकार राष्टिय दबूया नायः श्रीकृष्ण महर्जन, राससया प्रधान सम्पादक राजु शाक्य लागयतयापिन्सं स्वास्थ्य दर्पण मिडिया नेटवर्कं स्वास्थ्य दर्पण ज्याझ्वः न्ह्याका वयाच्वंगु नापं उकिं लाकाच्वंगु लिच्वःया बारे थःथःगु नुगःखँ प्वंकूसे सम्मानित जुयादीपिं ब्यक्तित्वपिन्त भिंतुना देछायादीगु खः ।
