हलिं नेवाः दबूपाखें आमाघरयात ग्वाहालि
विकाश | तछलागा द्वितीया ११४०
हलिं नेवाः दबुलिं हाःनाः मदुपिं ज्याथःजिथिपिन्त सुसाःकुसाः यानावःगु आमा घरयात ग्वाहालि याःगु दु । हलिंन्यंक महामारीया रुपं न्यंगु कोरोना भाइरस (कोभिड १९) या हुनिं आमा घरयात समस्या जूगुलिं हलिं नेवाः दबू (डब्ल्युएनओ) पाखें ग्वाहालि याःगु खः ।
हलिं नेवाः दबूया केन्द्रीय नायः सिजन श्रेष्ठया पहलय् अमेरीकां छ्वयाहःगु आर्थिक ग्वाहालि दबूया नेपाः च्याप्टरया प्रतिनिधिपिं वनाः लःल्हानाथकूगु खः ।
आमा घरया निंतिं अमेरिकाया मेरिल्यान्डय् च्वनादीम्ह सुमन कुमार सिंहं (सुमन नेवाः) छ्वयाहःगु द्वःछि डलर (१ लाख २० हजार तका) आइतवाः आमा घरया संचालक दिलशोभा श्रेष्ठयात लःल्हायेयंकूगु खः ।
दबूया पहलय् अमेरिकाया मेरिलायन्डय् च्वनादीम्ह सुमन कुमार सिंह (सुमन नेवाः)पाखें वःगु द्वःछि डलर दबूया नेपाः च्याप्टर नायः शाक्य सुरेन व दांभरिं सुरेन्द्र भक्त श्रेष्ठं आमा घरया संचालक श्रेष्ठयात लःल्हानादीगु खः ।
ग्वाहालिं दां लःल्हाना कासें आमा घरया संचालक समाजसेवी दिलशोभा श्रेष्ठं हलिं नेवाः दबू व ग्वाहालि यानादीम्ह सुमन नेवाःयात नं सुभाय् देछासें कोरोना महामारीया अवस्थाय् नं थःपिंसं लँय् हाःनाः मदयेक च्वनाच्वंपिं ज्याथःजिथिपिंतसेवा बियाच्वनागु धयादिल ।
लँय् लानाच्वंपिं ज्याथःजिथिपिंत प्रहरीं आमा घरय् तयेहयेवं झिंप्यन्हु तक बिस्कं हे क्वथाय् तयाः सुसाःकुसाः यानाः आः आमा घरय् हे आश्रय बिया वयाच्वनागु खँ वय्कलं जानकारी बियादिल ।
Categorized in राष्ट्रिय
