हलिं नेवाः दबूया पदाधिकारी दथुइ म्हसीका कालबिल
लहनान्युज | चिल्लागा एकादशी ११३९ (अप्रिल १ २०१९)
नेपाल लिपि गुथिं हलिं नेवाः दबूया स्वक्वःगु तःमुँज्यां निर्वाचित जुयादीपिं न्हूपिं पदाधिकारीपिंलिसें छगू ज्याझ्वःया दथुइ म्हसीका कालबिल ज्याझ्वः यात ।
दबूया न्हूम्ह नायः सिजन श्रेष्ठं हलिं नेवाः दबूपाखें नेपाल लिपि गुथिं न्ह्याकाच्वंगु अभियानयात अमेरिकाय् च्वंपिं नेवाःतय्संं फूकथं ग्वाहालि याय्गु नितिं सहलह ब्याकेगु कनादिल ।
ज्याझ्वलय् दबूया बरिष्ठ दुजः दयारत्न शाक्यं दबूया न्हापांगु तःमुँज्याय् लिपि दुगु टि–सर्ट पिथनाः हलिंन्यंकं लिपिया प्रचार यानागु जानकारी बियादिसें उगु टि–सर्ट लिपि गुथियात सुरक्षित यानातय्त लःल्हानादीगु खः ।
थ्व हे झ्वलय् लिपि गुथिया नायः निरञ्जन ताम्राकारं नेपाल लिपि गुथिं यानाच्वंगु थीथी ज्याया जानकारी बियादीगु खः ।
