हाइटीया राष्ट्रपतिया हत्याय् वर्तमान प्रधानमन्त्री एरियल हेनरी नं शंकाय्
ञंलाथ्व नवमी ११४१, भाद्र ३० बुधवाः
क्यारेबियन देय् हेइटीया राष्ट्रपति जोभेनल मोइसया हत्या अनुसन्धानय् वर्तमान प्रधानमन्त्री एरियल हेन्री नं शंकाया चाकलय् लाःवःगु दु ।
हत्या प्रकरणय् छानविन यानाच्वंम्ह मुख्य अभियोजनकर्तां प्रधानमन्त्री हेन्रीयात नं अभियोग दर्ता याकेत स्वःगु दु । वय्कलं प्रधानमन्त्रीयाके बयान नं कायेधुंकूगु दु । मुख्य अभियोजनकर्तां प्रधानमन्त्री हेन्रीयात देय् त्वःतेत प्रतिबन्ध तःगु दु ।
राष्ट्रपति मोइसया हत्याय् शंकास्पद छम्हेसिनं घटनाया छुं घौ लिपा वर्तमान प्रधानमन्त्री हेन्रीयात फोन याःगु दसि लुइधुंकाः वय्कः शंकाया चाकलय् लाःवःगु खः ।
हेइटीया राष्ट्रपति जोभिनल मोइसयात वंगु जुलाई ७ य् राजधानी पोर्ट औ प्रिन्सस्थित निजी निवासय् सशष्त्र पुचलं स्यानाब्यूगु खः । हत्याय् ल्हाः दुपिं पेशेवर अपराधीतय्त ज्वंसां मुख्य योजनकार लुइकेमफुनि ।
हत्याय् अमेरिका, कोलम्बिया व क्यानाडाया पूर्व सैनिकतय्गु ल्हाः खनेदु । हेइटीया न्याय मन्त्रालयया छम्ह पुर्व कर्मचारी जोसेफ फेलिक्स बादियो नं शंकाया चाकलय् लाःगु दु ।
Categorized in अन्तर्राष्ट्रिय
