हाकनं छकः ‘ल्वाकीपिं व ल्वाइपिं झी’
लहनान्युज | चौलागा पंचमी ११४३, चैत्र २८ मंगलवाः
थनथाय् भाजु राजेन मानन्धरं च्वयादीगु छपु लेखया छ्यं लुमना वयाच्वन, ‘ल्वाकीपिं व ल्वाइपिं झी’ । छपुचः दयाच्वनी अथवा धाय् सुं दयाच्वनी, सुया ज्या हे जुइ ल्वाकेगु । मेपिन्त ल्वाकातय्गुलिइ व पुचः वा मनूया थीथी उद्देश्य दय्फु । रेसलिङ स्वयाः न्ह्यइपुके थें मेपिन्त ल्वाकाः मनोरन्जन काय्गु उद्देश्य नं जुइफु । मेपिन्त ल्वाकाः निगू पुचः फायाः उकी दथुइ थम्हं छुं कथं आर्थिक लबः काय्गु हे उद्देश्य नं जुइफु । अले मेपिन्त ल्वाकाः थः नेतागिरी यानाः हिरो जुइगु उद्देश्य नं जुइफु । ल्वाकेगुया उद्देश्य आपालं दय्फु तर, ल्वाकीपिं स्वयां ल्वाइपिं हे मुर्ख खः धाःसा छुं पाइला ? सखे, पाइमखु जुइ ।
झीत ल्वाकेगु कुतः हरदम जुयाच्वंगु दु । चाहे, स्वन्ति अथवा सापारुया तिथि विवाद हयां जिल ला, चाहे लकडाउनय् बुंगद्यःया जात्राया खँ कयां जिल ला, नेवाःतय्त न्ह्याबलें ल्वाका हे च्वंगु दु । आः राजनीतिक आस्था व धार्मिक आस्थायात कयाः ल्वाकेगु ज्या ला सदाबहार खँ हे जुल । आः वयाः ल्वाकीपिनि अथवा ल्वाकीम्हेसिनं न्हूगु विषय लुइकूगु दु, किपुलिइ याकः मिसालिसे बुंगद्यःया प्रतिमूर्ति स्थापना ।’ थौंकन्हय् क्वानाच्वंगु अले नेवाःत ल्वानाच्वंगु विषय थ्व हे खः । अले सुयां नितिं न्ह्यइपूगु व नेवाः समुदायया नितिं म्हाइपूगु व मछालापुस्सेच्वंगु हे धाःसां ज्यू, झी नेवाःत ल्वाना नं च्वनागु दु ।
बुंगद्यः धयाकथं नेपाःया हे म्हसीकालिसे स्वानाच्वंगु खँ खः । सकल नेवाःतय्गु आस्था स्वानाच्वंगु दु । धर्म व आस्थाया दथुइ त्यःमत्यः, ज्यू मज्यू धइगु खँ स्वाभाविक खः । किपुलिइ याकः मिसायात छाय् याकः मिसा धाल धइगु खँय् नं बुंगद्यःलिसे स्वानाच्वंगु किम्वदन्ति समाजय् प्रचलित हे दु । व हे कारणं पानेजुपिन्सं किपुलिइ बुंगद्यःया प्रतिमूर्ति तय्बलय् बुंगद्यःया स्वां याकः मिसायात छाःवनेमाःगु औचित्य मन्त धकाः विरोध यात खः । बुंगद्यः व याकः मिसा नापं तय्बलय् याकः मिसाया महत्व हे मदइगु खँ नं नकारे याय् ला मछिं । थ्व हे हुनिं पानेजुपिन्सं विरोध यात धकाः लाक्वपाक्व धाय्गु, सामाजिक संजालय् पानेजुतय्त नापं किपूमितय्त ब्वः बियाच्वनेगु हिसि दुला ?
उकिया नापं बुंगद्यःया प्रतिमूर्ति दय्काच्वंगु ला न्हापा हे मस्यूगु मखु । सामाजिक संजालय् खँ ला पिदना हे च्वंगु खः । अथेसां किपुलिइ बुंगद्यः तय्मज्यू धाःपिं न्हापा छाय् सुम्क च्वनाच्वन ? न्हापा हे छाय् मज्यू मधाल ? छु, बुंगद्यः दय्के सिधय्काः किपुलिइ तय्हइ अले विरोध याय् धकाः हे पियाच्वंगु ला ? थनथाय् कमजोरी निगुलिं पक्षया खनेदु ।
आः बुंगद्यः दय्के हे धुंकाः छगू पुचःया ला आस्थाय् ध्वःगु नं दु, मेहनत नं सितिं वंगु दु । विकल्पय् सहलह जुइमफूगु दकले तःधंगु कमजोरी खः । नापं, व कमजोरी ल्वाकीपिनिगु नितिं तःधंगु ह्वःताः खः । थ्व खँय् वाःचाय्काः ल्वाकीपिन्त लबः बियाः नेता दय्काच्वनेगु स्वयां निकासपाखे वनेत निगुलिं पुचः लचक जुइगु हे बांलाइ ।
