हात्तीसारय् थौं नं हिति मालेज्या जुइगु
येँया हात्तीसारय् थौं नं हिति मालेगु नितिं उत्खनन् यायेत्यंगु दु । म्हिगः बिहिबाः डोजरं म्हुयाः हितिया संचरना लुयावःगु खःसा सरोकारवालातयगु रोहवरय् थौं नं उत्खनन् यायेत्यंगु खः ।
 
हात्तीसारया छगू निजी बुँइ पुरातात्विक व ऐतिहसिक महत्वया ल्वहँहिति ल्हाकाछ्वःगु धासें छथ्व सम्पदा अभियन्तातयसं सः थ्वयेकेधुंकाः बिहिबाः उत्खनन् न्ह्याकूगु खः ।
 
उगु इलय् हिति दुगु धयातःगु थासय् डोजरं म्हुयावंबलय् ल्वहँहितिया पःखाः व बँ खनेदयावःगु खःसा लः नं पिहांवःगु दु ।
 
बुँथुवाःया ग्वाहालिं महानगरपालिका, पुरातत्व विभाग र स्थानीय बासिन्दाया रोहवरय् ल्वहँहिति उत्खननया ज्या जुयाच्वंगु दु ।
 
उत्खननया निरिक्षण यायेत थ्यंकःझाःम्ह वडा १ या वडाध्यक्ष भरतलाल श्रेष्ठं उगु थासय् हिति थम्हं खनागु जक मखु, न्हापा अन म्वः तकं ल्हुइनंगु धयादिल ।
 
वि.सं. २०५१ सालय् नं उगु बुँइ नक्सा पासया प्रक्रिया न्ह्यःने यंकेत स्ववःबलय् वडां रोक्का यानाब्यूगु खः ।  उगु इलय् अन जुइत्यंगु निर्माणया ज्या पनेत स्थानीयया पुचलं निवेदन ब्यूगु खः ।
 
५१ सालया उगु मुद्दायात थम्हं हे स्वयागु तत्कालीन वडा दुजः पुरुषोत्तम खकुरेलं धयादिल । न्हापा थम्हं खनागु हिति आः वयाः नापीया नक्साय् तकं खनेमदुगु खकुरेलं धयादिल । पुरातात्विक ऐतिहासिक महत्वया सम्पदा न्हंकाः बुँ नयेगु नियोजित षडयन्त्र हे जूगु दावी वयकलं यानादिल ।
 
२४ आना ३ पैसा ३ दाम दुगु उगु बुँ २०७२ सालय् बुद्धिलक्ष्मी गुरुङं न्याःगु धाःगु दु । न्हापा बीरशमसेर जबराया नामय् दुगु बुँ शाक्य परिवारं न्याःगु व शाक्य परिवारपाखें तेजराज मानन्धर जुयाः गुरुङतक्क थ्यंगु जानकारी पूर्व वडाध्यक्ष किरण श्रेष्ठं बियादिल ।