हेमराज शाक्य अंकित वहःया पाँय्म्वः पूर्वकुमारीया ल्हातं पिदन
राजेश बज्राचार्य | ने. सं. ११३७ कौलागा दशमी (अक्टुबर १४, २०१७)
बौद्ध विद्वान् एवं लिपि विशेषज्ञ पं. हेमराज शाक्यया किपा अंकित वहःया पाँयम्वः पूर्वकुमारी मतिना शाक्यया ल्हातं पितब्वज्या जूगु दु ।
भिंतुना गुथिं स्वन्ति व न्हूदँया लसताय् दँयदसं वहःया पाँय्म्वः पिथनेगु ज्याःयात निरन्तरताबिसें थुगुसी गुदँलिपा थःगु छेँय् लिहांबिज्याःम्ह पूर्वकुमारी मतिना शाक्ययात न्हापांगु पाय्म्वः देछागु खः । नेपाल सम्वत ११३८ क्यनिगु लसताय् गुथिपाखें थुगुसीनापं झिंस्वक्वःगु पिथना कथं पं. हेमराज शाक्य अंकित पाँयम्वः पिथंगु खः ।
येँया दगू बहालय् छगू विशेष ज्याझ्वःया दथुइ पाँयम्वः पितब्वसें उगु पाँय्म्वः आःयाम्ह न्हूम्ह कुमारीमाजु तृष्णा शाक्ययात देछायेगु जानकारी नं ग्वसाः खल भिंतुना गुथिया नायः गोपालकृष्ण श्रेष्ठं जानकारी बियादिल ।
ज्याझ्वःसं प्रा. प्रेमशान्ति तुलाधरजुं पाँयम्वःलय् अंकित स्व. बौद्ध विद्वान् एवं लिपि विशेषज्ञ पं. हेमराज शाक्यया छेँजःपिनिगु समुपस्थितिइ संक्षिप्त म्हसिका न्ह्यब्वयादिइगु खः ।
ज्याझ्वलय् पं. हेमराज शाक्यया कायभाजु सुरेन्द्र शाक्यजुं थः अबुया गुण लुमंकाः वहःया पाँयम्वः पिकाःगुलिइ वयेक सूखावती भूवनसं लयलय्ताना सकसित सुवाः बियाच्वंगु कल्पना यानादिल । वयेकलं बाल्यकालया स्मृति न्ह्यथँसे थः अबुजु बौद्ध विद्वान व लिपि विशेषज्ञ जक मखसे प्राचीन सिक्काया संग्रहकर्ता नं जूगु धयादिल । थीथी सम्मान मध्ये नं थुगु दिं या सम्मान अतिकं बिस्कंया जूगुलिं ग्वसाः खलःयात सुभाय् देछानादिसें वयेकलं धयादिल, “थःगु मल्लकालिन निसेया पाय्म्वः संग्रह थःत लःल्हानादीगु खना तात्कालिन जुजु महेन्द लय्ताया बाःयात ब्यूगु ७द्वः दाँमं निर्माण शुरु जूगु छेँ हे जिगु बाल्यकाल सुखदायी जुया न्ह्याःगु खः ।”
भिंतुना गुथिया नायः श्रेष्ठया सभानायःसुइ जूगु थुगु ज्याझ्वलय् गुथिया छ्याञ्जे दिपकरत्न तुलाधरजुं वहःया पाँय्म्वःबारे जानकारी बियादिइगु खः ।
विद्यासागर तुलाधरजुं न्ह्याकादीगु ज्याझ्वलय् भिंतुना गुथि मिसा पुचःया छ्याञ्जे रमा तुलाधरं थःगु नुगःखँ तयादीगु खःसा लसकुस न्वचु गोपालकृष्ण श्रेष्ठं व गुथिया निवर्तमान नायः रत्नवीर शाक्यं सुभाय् देछानादीगु खः ।
ने.सं. ११२५ निसें वहःया पाँयम्वः पिथनाच्वंगु भिंतुना गुथिं राष्ट्रिय विभूति एवं नेपाल संवतया प्रवर्तक शंखधर साख्वाः, कविकेशरी चित्तधर हृदय (११२६), पं. निष्ठानन्द बज्राचार्य (११२७), महाकवि सिद्धिदास महाजु (११२८), माष्टर जगतसुन्दर मल्ल (११२९), योगवीरसिंह कसाः (११३०), साहित्य सुता बौद्ध ऋषि महाप्रज्ञा (११३१), भाषाजवाः धर्मा्दित्य धर्माचार्य (११३२), भाषानिभाः प्रेमबहादुर कसाः (११३३), कविरत्न सिद्धिचरण श्रेष्ठ (११३४), सहिद शुक्रराज शास्त्री (११३५) व गौतम बुद्ध (११३६) पिनि किपा अंकित वहःया पाँय्म्वः पिथनेधुंकूगु दु ।
किपाः प्रमोद शाक्य
