हेमोडाईलासिस सेवाया लागि महानगरं १ करोड ५० लख अनुदान
सुरेन्द्रभक्त श्रेष्ठ | चिल्लाथ्व पारु ११४०
जलास्येँ ल्वय् उपचारया लागि येँ महानगरपालिकां बीरेन्द्र सैनिक अस्पताल छाउनीयात १ करोड ५० लख ग्वाहालि याउगु दु ।
थौं मंगलवाः सभागृहय् महानगरया प्रमुख बिद्यासुन्दर शाक्यं जङ्गी अड्डाया कल्याणकारी योजना निर्देशनालयया निर्देशक सहायक रथी सागरबहादुर के. सी. उगु चेक लःल्हागु खः ।
थुगु सेवाया लागि वःगु पुष २ गते महानगर व नेपाली सेना दथुइ सम्झौता पतिइ ल्हाःचिं तयादिगु खः । उगु सम्झौता बमोजिम माघ ७ गते येँ महानगरया शिफारिसय् हेमोडाईलासिस सेवा न्ह्याकुगु खः। थुगु सेवा काम्ह न्हापाम्ह येँ वडा १५ डल्लुया चन्द्र महर्जन खः ।
उगु ज्याझ्वलय् येँ महानगरया प्रमुख शाक्यं जटिल खालया ल्वय् या लागि बिशेषज्ञ उपचारया लागि महानगरं नेपाली सेना नाप सहकार्य यानागु धयादिसे उपचारया झ्वलय् माःगु मेमेगु सेवा थपे याना यंकेगु जुइ धका धयादिगु खः ।
उगु ज्याझ्वलय् महानगरया प्रवक्ता नाप वडा १५ या अध्यक्ष ईश्वरमान डंगोल, सहरी योजना आयोगया सदस्य गुजेश्वरी श्रेष्ठ, बीरेन्द्र सैनिक अस्पताल छाउनीया निमित्त कमान्डान्ट सहायक रथी नगेन्द्रकुमार के. सी., महासेनानी डा. अजय राजभण्डारी, महानगरया जनस्वास्थ्य महाशाखाया निर्देशक नरेन्द्रबिलास बज्राचार्य, बित्त बिभागया प्रमुख बुद्धरत्न मानन्धर पिनिगु न सहभागी दुगु खः ।
उगु सम्झौता बमोजिम येँ महानगर पाखे प्रवक्ता नाप वडा १५ या अध्यक्ष ईश्वरमान डंगोलया संयोजकत्वय् गुजेश्वरी श्रेष्ठ सदस्य व जनस्वास्थ्य महाशाखाया निर्देशक नरेन्द्रबिलास बज्राचार्य सदस्यसचिव अथहे नेपाली सेनापाखे निमित्त कमान्डान्ट सहायक रथी नगेन्द्रकुमार के. सी. व महासेनानी डा. अजय राजभण्डारी सदस्य च्वनादिगु खः ।
महानगरबासी व महानगरया कर्मचारीया लागि उपलब्ध जुइगु थुगु सेवा कायेत येँ जिल्ला जनस्वास्थ्य कार्यालय व महानगरया जनस्वास्थ्य विभागपाखे सिफारिस याये माः ।
