१३क्वःगु साग : भलिबलय् नेपाल भारतलिसे बुत
१३क्वःगु दक्षिण एसियाली कासा (साग) अन्तर्गत मिसा भलिबलय् निगूगु व लिपांगु कासाय् नेपाल भारतलिसे बूगु दु ।
 
त्रिपुरेश्वरस्थित कभर्डहलय् जूगु कासाय् नेपाल तप्यंगु सेटय् बूगु खः । न्हापांगु सेटय् बांलाःगु कासा म्हितूगु नेपालं निगू सेट प्वाइन्ट ल्यंके मफुबलय् २६/२४य् बुइमाल ।
 
निगूगु सेटय् २५/१२ व स्वंगूगु सेटय् नेपाल २५/१६या स्कोरं नेपाल बुत । 
 
थुगु कासा धुंकाः नेपाल व भारतया ज्वलिंज्वः ३ हे ल्याः जूगु दु ।
 
आः पुचःया लिपांगु कासाय् भारत व बंगलादेश म्हिती । थुगु कासां हे पुचःया त्याकामि व ल्यू त्याकामि क्वःछी ।
 
मिजं भलिबलपाखे बिहीबाः भारत व पाकिस्तान त्याःगु दु । 
 
भारतं बंगलादेशयात तप्यंगु सेटय् बुकाः सेमिफाइनल लिक्क थ्यन । भारत २५/१८, २५/१४ व २५/१५ या स्कोर दयेकाः त्यायेत ताःलात ।
 
आः नेपालं पुचःया लिपांगु कासाय् शुक्रबाः भारतलिसे म्हिती । स्पष्ट जितं जक नेपाल सेमिफाइनल थ्यनेफइ । 
 
पुचः बी या कासाय् पाकिस्तानं माल्दिभ्सया तप्यंगु सेटय् बुकाबिल । 
 
पाकिस्तान २५/१६, २५/२३ व २५/१५ या स्कोरं त्यात । कासा त्यायेधुंकाः पाकिस्तान सेमिफाइनल लिक्क थ्यंगु दु । 
 
पाकिस्तानं आः पुचः झ्वःया लिपांगु कासाय् शुक्रबाः श्रीलंकालिसे म्हिती ।
Categorized in कासा