१४क्वःगु दक्षिण एसियाली खेलकुद सन् २०२३ या मार्चय् पाकिस्तानय् जुइगु
दिल्लाथ्व तृतीया ११४१,असार २९ मंगलवाः
दक्षिण एसियाली खेलकुद, सागया १४क्वःगु संस्करण पाकिस्तानय् जुइत्यंगु दु ।
सन् २०२३ या मार्च महिनाय् धेंधेंबल्ला जुइगु निर्णय याःगु दु । दक्षिण एसियाली ओलम्पिक काउन्सिलया म्हिगःच्वंगु भर्चुअल मुँज्यां १४क्वःगु साग यायेगु विषयलय् निर्णय याःगु खः ।
न्यागू शहरय् जुइगु १४क्वःगु सागय् २७गू कासा दुथ्याइ । धेंधेंबल्लाया मू कासा लाहोरय् जुइगु धागु दुसा फैसलावाद, गुजरनवाला, इस्लामावाद व सिलाकोटय् तकं कासा जुइ । १३क्वःगु साग सन् २०१९ य् नेपालय् जूगु खः ।
घरेलु सागय् नेपालं ५१गू स्वर्ण पदक त्याकाः ल्यू जूगु खः । १३क्वःगु सागया क्वचायेधुंकाः पाकिस्तानयात १४क्वःगु साग ग्वसाःग्वयेत ध्वाँय् लःल्हाःगु खः । साधारणतयाः साग ग्वसाःग्वगु देशं ध्वाँय् लःल्हानाः जिम्मेवारी हस्तान्तरण यायेगु परम्परा दु ।
पाकिस्तानयात साग ग्वसाःग्वयेगु जिम्मेवारी ब्यूगु खःसां दछि तक सागया मिति क्वःछिइत अलमल जूगु खः ।
Categorized in कासा
