२०७४ बैसाख ३१य् स्थानीय चुनाव
लहनान्यूज | सिल्लागा नवमि ११३७ (फेब्रुअरी २० २०१७)
सरकारं वइगु २०७४ वैशाख ३१ गते स्थानीय तगिंया निर्वाचन यायेगु घोषणा याःगु दु ।
मन्त्रिपरिषदया सोमबाः च्वंगु स्वंगूगु मुँज्यां स्थानीय तगिंया चुनावया मिति बैसाख ३१ क्वःछ्यूगु खः । सरकारं वैशाख ३१ गते आइतबारया दिं कुन्हु छगू हे चरणय् स्थानीय तगिंया चुनाव यायेगु क्वःछ्यूगु खः ।
न्हापा स्थानीय चुनाव निगू चरणय् यायेगु तयारी जुयाच्वंगु खः । लिसें आयोगं जेठ १ व २१ गते चुनाव यायेत प्रस्ताव याःगु खः ।
तर, सत्तारुढ नेपाली कांग्रेस व माओवादी केन्द्र दथुइ आइतबाः च्वंगु मुँज्यां वैशाखया लिपापाखे स्थानीय चुनाव यायेगु सहमति याःगु खः ।
मुँज्यां स्थानीय तगिंया चुनावया लागिं निर्वाचन आयोगयात झण्डै १०त्या अर्ब बीगु नं क्वःछ्युगु दु । १० अर्ब २९ करोड ६३ लख ७६द्वः ७सः व ७५ तका चुनाव खर्च उघ्रिमय् निकासा यायेत अर्थ मन्त्रालययात उजं ब्यूगु दु ।
चुनाव घोषणा जूगुलिसें राप्रपालिसें प्रमुख विपक्षी नेकपा एमालें थुकियात लसकुस याःगु दु । तर मधेसी मोर्चां धाःसा आन्दोलनया ज्याझ्वः सार्वजनिक याःगु दु ।
थौं हे स्वक्वः मुँज्या
स्थानीय चुनाव घोषणाया हे लागिं थौं मन्त्रिपरिषद् मुँज्या स्वक्वः च्वंगु खः ।
मन्त्रिपरिषदया थौं च्वंगु न्हापांगु मुँज्यां तराईलय् स्थानीय तगिंया ल्याः थकायेगु क्वःछ्युसें स्थानीय विकासमन्त्री हितराज पाण्डे नेतृत्वया कार्यदलयात न्हयन्हुया ई बीगु क्वःछ्यूगु दु ।
न्हिनय् च्वंगु निगूगु मुँज्यां १४ देयया राजदूत नियुक्तया लागिं सिफारिस याःगु दु ।
मन्त्रिपरिषदया मुँज्यां युएईस आशा लामा, जापानय् प्रतिभा राणा, डेनमार्कय् युवनाथ लम्साल, बहराइनय् पदम सुन्दास, अस्ट्रेलियाय् लक्की शेर्पा, कतारय् रमेशप्रसाद कोइराला, साउदी अरेबियाय् महेन्द्र सिंह व म्यानमारय् भीम उदासयात राजदूत नियुक्त यायेत सिफारिस याःगु दु ।
अथे हे, श्रीलंकाय् विश्वम्भर प्याकुरेल, यमनय् शर्मिला पराजुली, दक्षिण कोरियाय् अर्जुन जंगबहादुर सिंह, बंगलादेशय् चोपलाल भुसाल, स्पेनय् भरत रायमाझी व इजरायलय् निरन्जन थापायात राजदूत नियुक्त यायेत सिफारिस याःगु खः ।
स्पेनय् दूतावास मालेगु लिसें राजदूत नियुक्तिया नं सिफारिस यायेगु क्वःछ्यूगु दु ।
सरकारं सिफारिस याःपिं राजदूतपिनिगु नां संसदीय सुनुवाइ विशेष समितिं अनुमोदन यायेधुंकाः राष्ट्रपतिं नियुक्त यायेगु संवैधानिक प्रावधान दु ।
Categorized in राजनीति
