२८ दँया इतिहासय् नेपाःयात न्हापांखुसिइ साफया च्याम्पियन जुइगु ह्वता
कौलाथ्व एकादशी ११४१, शनिबाः
माल्दिभ्सय् न्ह्यानाच्वंगु साफ च्याम्पियनसिप फुटबलया उपाधि धेंधेंबल्ला थौं जुइत्यंगृ दु ।
मालेस्थित राष्ट्रिय रंगशालाय् जुइगु फाइनलय् नेपाः व भारत दथुइ धेंधेंबल्ला जुइत्यंगु दु । नेपाः व भारत दथुया कासा नेपाली ई कथं चान्हय् ८ ता ई जुया ४५गु मिनेटय् न्ह्याइ ।
थौं निगुलिं टिम उपाधि त्याकेगु आज्जु लिसे मैदानय् कुहाँवयेत्यंगु दु । ५गू राष्ट्र दुथ्यागृु राउण्ड रोबिन लिगया लिधंसाय् जूगु धेंधेंबल्लाया शीर्ष थासय् दूगु भारतं फाइनल म्हितेत्यंगु खः ।
नेपालं निगूगु थासय् च्वना फाइनलय् थाय् सुरक्षित याःगु खः । साफ इतिहासय् नेपाः न्हापांखुसिइ फाइनल थ्यंगु खः । नेपालं थ्वयान्ह्यः सेमिफाइनल तक्कया यात्रा क्वजिना वयाच्वंगु खः ।
भारतं आःतक्क ७क्वःखुसिइ उपाधि त्याकेधुंकुगु दु । साफ अन्तर्गत हे लिग चरणय् नेपाः व भारत दथुइ धेंधेंबल्ला जूगु खः । उगु कासाय् भारतं नेपाःयात १गू–०या गोल अन्तरं बुकुगु खः ।
भारतविरुद्ध नेपालं आःतक्क २२गू कासा म्हितुगु दु । गुकिइ भारत पूर्णरुपय् हावी जूगु दु । नेपालविरुद्ध भारतं १५गू कासा त्याकुगु दु । नेपालं निगू कासा त्याकुबलय् ५ गू कासा ज्वलिन्ज्वःलय् क्वचागु दु ।
Categorized in कासा
