२०७८ माघ ५, बुधबार

३३ किलो लुँ तस्करी प्रकरणया अभियुक्त गोरेया किजायात नेपाल हल

लहनान्यूज | थिंलागा तृतीया ११४२, पुस २१ बुधबाः

३३त्या किलो लुँ तस्करीया मू आरोपी चूडामणि उप्रेती ‘गोरे’ या किजा रमेश उप्रेतीयात नेपाल प्रहरीं दुबई नं येँय् हःगु दु ।

इन्टरपोलया ग्वहालिइ दुबईलय् ज्वंम्ह उप्रेतीयात मंगलबाः येँय् हःगु खः । उप्रेतीयात दुबईलय् ज्वंगु खः धइगु मक्यनेत त्रिभुनव अन्तर्राष्ट्रिय विमानस्थलय् ज्वनागु दाबी प्रहरीं याःगु दु ।

गौशला प्रहरी वृत्तय् तयातःम्ह वय्कःयात थौं विराटनगर छ्वयेगु तयारी दु । वय्कःयात थौं हे जिल्ला अदालत मोरङय् पेश यायेगु तयारी जुयाच्वंगु दु ।

मोरङया उर्लाबारी नगरपालिका–७ याम्ह दुबईलय् च्वनावःम्ह रमेश उप्रेती ३३ किलो लुँ तस्करी मुद्दाय् फरार अभियुक्त खः । उगु प्रकरणया मूख्य अभियुक्त धयातःम्ह गोरे धाइम्ह चुडामणि उप्रेतीया किजा रमेशं दुबइलय् च्वनाः नेपालय् लुँ छ्वयाहयेगु याःगु दाबी छानविन समितिया प्रतिवेदनय् यानातःगु दु ।

लुँ तस्करी काण्डया मेपिं अभियुक्ततय्सं सफाई चूलाकूगु इलय् प्रहरीं गोरेया किजायात दुबइनं नेपाल हःगुलिं थप तथ्य सार्वजनिक जुइगु विश्वास याःगु दु । २०७४ माघय् चूडामणि उप्रेती ‘गोरे’ या पुचलं दुबईनं हःगु ३३त्या किलो लुँ त्रिभुवन विमानस्थलं पिहां वयेधुंकाः लुटपाट जूगु खः ।

उगु लुँ सुचुकूगु द्वपनय् तस्कर पुचलं यातना बियाः सनम शाक्ययात स्याना तकं ब्यूगु खः । सरकारं गृह मन्त्रालयया तत्कालीन सह–सचिव ईश्वरराज पौडेलया नेतृत्वय् विशेष समिति दयेकाः अनुसन्धान याःगु खः ।

Categorized in अपराध