३५क्वःगु परियत्ति बक्तृत्वकला कासा जुल
लहनान्युज | चिल्लाथ्व सप्तमी ११४०
परियत्ति बक्तृत्वकला सञ्चालक समितिया ग्वसालय् व सुवर्ण छत्रपुर विहार, लुभुया व्यवस्थापनय् फागुण १७ गते छत्रपुर विहारय् स्वीन्याक्वःगु परियत्ति बक्तृत्वकला कासा जुल ।
श्रद्धेय भिक्षु बोधिज्ञानपाखें पञ्चशील प्राथनापाखें न्ह्याःगु उगु कासा समितिया नायः समाजसेवी मोतिलाल शिल्पकारया सभाध्यक्षताय् जूगु खःसा मूपाहांकथं उगु हे वडाया दुजः अम्बिका श्रेष्ठ झायादीगु खः ।
स्वनिगःया झिंन्यागू परियत्ति केन्द्रपाखें ब्वति काःगु उगु कासाय् सुवर्ण छत्रपुर परियत्ति केन्द्रया स्वस्तिका महर्जन न्हाप, भास्सरा परियत्ति केन्द्रया युशा शाक्य ल्यू व श्री शाक्य सिंह परियत्ति तथा प्रौढ शिक्षालयया सिमून सिंह लियांल्यू लाःगु खः ।
हरेक प्यलाय् छक्वः जुइगु उगु कासाया स्वीखुक्वःगु कासाया व्यवस्थापनया जिम्मा येँया मीनभवनय् च्वंगु विश्व शान्ति विहारयात ग्वसाः खलकं लःल्हाःगु खः ।
