७दँया मचालिसें थप ३म्हेसित संक्रमण पुष्टि
विकाश | बछलागा सप्तमी ११४०,बैसाख ३० गते
येँयाम्ह न्हयदँया मिजंमचालिसें थप स्वम्हेसिके कोरोना संक्रमण पुष्टि जूगु दु ।
थौं थप संक्रमण पुष्टि जूपिंलय् येँ दहचोकया ७दँया मिजंमचा लिसें जनकपुर धनुषाया १७दँया मिसा व धादिङया ३०दँया मिसा दुगु स्वास्थ्य तथा जनसंख्या मन्त्रालयं न्ह्यथंगु दु ।
मन्त्रालयया प्रवक्ता समिरकुमार अधिकारीया कथं राष्ट्रिय जनस्वास्थ्य प्रयोगशालाय् याःगु परीक्षणय् उमिके संक्रमण पुष्टि जूगु खः ।
उपिं सकसिगु स्वास्थ्य अवस्था सामान्य दुगु व स्वास्थ्यकःमिया स्वापुतिइ दुगु मन्त्रालयं न्ह्यथंगु दु ।
थ्वयां न्ह्यः, थौं हे न्हिनय् ३म्हेसिके संक्रमण पुष्टि जूगु खः । गुकी येँ महाराजगंजया टिचिङ अस्पतालय् वासः याकाच्वंम्ह कपिलवस्तुया ६दँया मिसा मचा, चन्द्रागिरी नगरपालिकाया ३२दँया मिजं मचा व नवलपरासीया ४९दँया मिजं छम्ह दुगु खः ।
थ्व लिसें नेपालय् कोरोनाभाइरस (कोभिड १९) पाखें संक्रमितया ल्याः २सः व ४९ थ्यंगु दु ।
वमध्ये ३५म्हेसित लनेधुंकूगु दुसा लंपिं स्वम्हेसिके हाकनं संक्रमण खनेदयाः अस्पतालय् वासः याकाच्वंगु दु ।
Categorized in राष्ट्रिय
