२०७७ माघ १३, मंगलबार

​कुलमानया पुनः नियुक्तिया सः : सरकारयात सचेत याकेगु चिं

जुजुमान महर्जन
 
 
थौंकन्हय् तसकं चर्चाय् वयाच्वंम्ह ब्यक्तित्व खः, नेपाल विद्युत प्राधिकरणया कार्यकारी निर्देशक कुलमान घिसिङ । म्हीगः आइतवाः प्राधिकरणया कार्यकारी निर्देशक घिसिङया कार्यकाल क्वचाःगु दु । प्यदँ न्ह्यः वि.सं. २०७३ साल भदौ २९ गते प्राधिकरणया कार्यकारी निर्देशकय् नियुक्त जुयादीम्ह घिसिङया कार्यकाल क्वचाःगु खः । 
 
आः नेपाल सरकारं सुयात नियुक्त याइ धइगु खँय् हे विशेष केन्द्रित जुयाच्वंगु दु । थ्व छापा समाचारय् स्वयां नं सामाजिक सञ्जालय् अप्वः चर्चा जुयाच्वंगु खनेदु । जनताया मू च्यूताः धइगु विद्युत अर्थात मत खः । मत मदय्कं थौंकन्हय् (उबलय् नं खः, गुगु इलय् १८घौतक लोडसेडिङ जुयाच्वंगु खः ।) छुं हे ज्या मजुइगु अवस्थापाखें हाकनं न्हापाया अवस्थाय् जक लिहांवनीगु खःला धइगु ग्याचिकुं आः सुयात नियुक्त याइ धइगु खँय् सकस्यां च्यूताः क्यनाच्वंगु दु ।
 
कुलमान घिसिङ नेपाल विद्युत प्राधिकरणया कार्यकारी निर्देशक जुइधुंकाः नेपालय् १८घौतकया लोडसेडिङ चिकेगु ज्या जूगु खः । उलिजक मखु, थ्यंमथ्यं स्वीच्यागू अर्बया घाटाय् वनाच्वंगु प्राधिकरणयात दच्छिया दुने न्यागू अर्बतका फाइदा जुइकथं ज्या यानादीगु खः । थ्व हे कारणं हे कुलमानया बय्बय् जूगु खः । कुलमानं यानादीगु सक्षम नेतृत्व अले व्यवस्थापनया हुनिं जनताया ख्युंथाय् च्वनेम्वाल । 
 
प्राधिकरण आर्थिककथं सबल जुजुं वन । वय्कःया थुगु ज्यायात कयाः सकस्यां च्वछाय्गु ज्या जुयाच्वंगु दुसा आः वय्कःया कार्यकाल फुइधुंकाः हाकनं लोडसेडिङ जुइ खःला धइगु ग्याचिकुपाखें अप्वः तनाव ब्वलनाच्वंगु खनेदु । उकिं हे जुइमाः, कुलमानया कार्यकाल क्वचाय् न्ह्यः हे सामाजिक सञ्जालपाखें हाकनं कुलमान हे कार्यकारी निर्देशकय् नियुक्त जुल धकाः भिन्तुना तकं देछाय्गु ज्या जूगु खःसा थुकियात कयाः छुं नं कथंया निर्णय व नियुक्त याय्गु ज्या मजूनि धकाः नेपाल सरकारं तकं स्पष्ट याय्माःगु अवस्था ब्वलन ।
 
खय्त ला सरकारं हाकनं कुलमानयात हे नियुक्त याय्गु नितिं उर्जा, जलश्रोत तथा सिँचाई मन्त्रालयपाखें प्रस्ताव तयार यानाच्वंगु दु धइगु नं खँ पिहाँ वयाच्वंगु दु । छखे कुलमानयात हाकनं कार्यकारी निर्देशकय् नियुक्त मयात धाःसा सरकारयात अपजस जक दइगु खःला धकाः सरकार नं ग्यानाच्वंगु दुसा मेखे जनता हाकनं लोडसेडिङया मार फय्मालीगु खःला धइगु ग्याचिकुं कुलमानयात हे नियुक्त याय्माः धइगु दबाब बियाच्वंगु दु ।
 
तर थ्व खँ स्वयां नं कुलमानयात हे नियुक्त याय्गु नितिं दबाब बीमाःगु आःया आवश्यकता खः वा मखु धइगु खँय् नं बहस जुइमाःगु खनेदु । थौंकन्हय् दुई तिहाइया सरकार धकाः फुइँ याःसां नं जनतायात सन्तुष्टि जुइकथं छुं नं ज्या याय्फयाच्वंगु मदु । अखतं थीथी काण्डय् हे तक्यनाच्वंगु दु । थजाःगु इलय् जनताया दथुइ लोकंह्वाःम्ह कुलमानयात हाकनं नियुक्त मयाय्गु मनसाय दुसां उकियात न्ह्यःने हय् फयाच्वंगु मदु । 
 
उकिं कुलमानयात हे मनसाय मदुगुलिं कार्यकाल फुइधुंकाः नं नियुक्त याय्गु ग्वसाः मदुसा मेम्ह नं हय्गु आँट यानाच्वंगु मदु । अले जनतां कुलमानयात हय्गु नितिं सरकारयात मानसिककथं दबाब बियाच्वंगुलिं नं सरकारं बांलाःगु ज्या यानाच्वंगु मदु धइगु खँयात स्पष्ट यानाच्वंगु दु । अर्थात सरकारं नियुक्त याइम्ह मनूयात विश्वास मयाःगु धइगु छगू कथं सरकारयात हे जनतां विश्वास मयाःगु खः ।
 
तर जनतां नं कुलमानं याःगु ज्यायात मूल्याङ्कन यानाः हाकनं वहे माः धाय्गु स्वयां नं वथें जाःम्ह कुशल नेतृत्वकर्ता माः धकाः दबाब बीमाःगु खनेदु । न्ह्याबलें व हे मनू छगू थासय् जक च्वनेफइ नं मखु, सम्भव नं मदु । उकिया अर्थ वय्कःया विकल्प ला माले हे माःगु खनेदु । तर वयागु थासय् वइम्ह मनू हाकनं १८घौ लोडसेडिङ याइम्ह मज्यू धकाः सरकारयात पतिं ल्ह्वनेगु ज्या जुइमाः । खय्त ला कुलमानयात न्ह्यःने हःगु धइगु नं छगू कथं सरकारयात सचेत याय्गु संकेत हे खः धाःसां पाइमखु ।