२०८० चैत्र १५, बिहिबार

​गुट उपगुटया राजनीतिया पराकाष्ठा खः संसद विघटन

काजी
 
संसद धयागु जनताया समस्याया सम्वोधन जुइमाःगु थाय् खः । जनतां थःगु मत बियाः थः जनप्रतिनिधि त्याकाछ्वइगु धइगु हे उमिसं थासय् वनाः थःगु सः तइ, थःपिन्त जुयावःगु समस्याया बारे खँ ल्हाइ, समस्याया समाधान पिकाइ धकाः हे खः । 
 
थुकथंया वहस जुइगु थाय् धइगु संसद खः । व ल्याखं संसद धइगु चुनाव त्याःपिं नेतापिनिगु स्वयां नं चुनावय् नेतायात त्याकाछ्वइपिं जनतायागु खः । संसद धयागु सुयां खल्ती च्वंगु ग्वय् पक्कां हे मखु । यःसा लिकात नल, यःसा लिकात मेपिन्त इनाबिल, मयःसा खल्तीइ हे दुछ्वयाबिल वा वांछ्वयाबिल । संसद धयागु मात्र स्वंगः आखःया खँग्वः अथवा नेतात मुनाः पिकनिक न्याकः वनेगु थाय् पक्कां मखु । थौं जनताया व सः थ्वयेकेगु थाय् मन्त । 
 
निम्ह पार्टी नायःया ल्वापुइ जनताया सः सुत । शक्ति थःगु ल्हातं वंकेमबीगु, कुर्सी त्वःते म्वायेकेगु नितिं जनताया सः थ्वयेकेगु उगु थाय्या बलिदान बीगु ज्या जुल । संसदया गरिमायात थुलि याउँक कायेगु ज्या मजुइमाःगु  खः तर जुल । आकाझाकां संसद विघटनया प्रस्ताव वल । व प्रस्ताव वयाकथं प्रतिपक्षय् दुगु दलतय्सं जक मखु, सत्तारुढ दलं हे विरोध यात । संसद विघटनया प्रस्ताव अनुमोदन मयायेत राष्ट्रपतियात इनाप नं यात । 
 
नेतातय्सं, दलया प्रतिनिधिपिन्सं, सांसदतय्सं जक मखु, आम नागरिकं नं संसद विघटनया प्रस्तावप्रति असन्तुष्टी प्वंकल । तर राष्ट्रपतिपाखें नं मेपिनिगु सुयां सः मन्यंसे ओलीया संसद विघटनया प्रस्तावयात याउँक हे अनुमोदन यानाबिल । थ्व प्रस्ताव उलि याउँक हे अनुमोदन जुइगु कथंया ला खनेमदुगु खः । सुंलिसे छुं हे सहलह, परामर्श आदि मजुसें याउँक हे संसद विघटन जुयाबिल । 
 
छगू हे दल दुने नं गुट उपगुटया राजनीतिया पराकाष्ठा जुयाब्यूगु दु संसद विघटन । थुकथं जनमतया अपमान यानावनेगु खःसा कन्हय् निर्वाचनय् मत कुर्केबलय् जनतां सुइत गुकथं विश्वास यायेगु धइगु गम्भीर न्ह्यसः दंगु दु ।