न्हूगु आशा
जुजुमान महर्जन
लँया विकासया नापनापं देशया विकास जुइगु खँय् निगू मत मदु । तर नेपाःया सन्दर्भय् स्वय्गु खःसा माःकथंया लँ मदुगु जक मखु, दुगु लँया नं इलय् मर्मत सम्भार याय्मफूगु हुनिं तःधंगु समस्या फय्मालाच्वंगु अवस्था दु ।
थ्व सकस्यां फयाच्वंगु तःधंगु समस्या खः, सायद व स्वनिगःया लँ हे जुइमाः वा पूर्वनिसें पश्चिमय् च्वंगु जिल्लाय् हे जुइमाः वा नेपाःया थीथी जिल्ला स्वाइगु राजमार्ग हे जुइमाः, फुक्क थासय् व हे नियति फय्मालाच्वंगु थौंया यथार्थ खः ।
नेपाःया राजमार्गया अवस्था स्वय्गु खःसा तसकं नाजुक अवस्थाय् दु । उकिया इलय् हे स्तरोन्नति व भिंकेमाःगु खःसां नं इलय् मजूगु जक मखु, उकिया नितिं निश्चित इलय् क्वचाय्केत ठेक्का ब्यूसां नं इलय् क्वमचाय्कूसे म्याद जक थप यानाः सकसितं हायलकायल यानाच्वंगु दु ।
थुकिया ल्यूने सुयागु ल्हाः दु धइगु आःतक नं दुवालेगु ज्या जूगु मदुनि । थजाःगु नियति थौंकन्हय् नारायणगढ–मुग्लिम सतकं फय्मालाच्वंगु दु, गुकिं यानाः आम नागरिकत आवतजावतया नितिं हे तःधंगु समस्या जुयाच्वंगु दु । अथेखःसां नं थुकियात कयाः सम्बन्धित निकायया लापरवाहीं सतकया सुधार याय्गु स्वयां समयावधि थप याय्गु ज्या जक जुयाच्वंगु दु ।
थ्व छगू दसू जक खः, थजाःगु दसू मेमेथाय् मखु, देशया राजधानी जुयाच्वंगु येँय् नं अथे खः धाःसां पाइमखु । येँया त्रिपुरेश्वर सतक खण्डया अवस्थायात स्वय्गु खःसा नकतिनि छुं भचा राहत महसूस याःगु दुसा चोभार दक्षिणकाली सतकखण्ड अले स्वनिगः दुहांवइगु अतिकं महत्वपूर्ण कलंकी थक्वाःया सतक अवस्था स्वय्गु खःसां नं भिंकेगु ज्या तःदँ दय्धुंकाः नं आःतक नं क्वचाःगु मदुनि ।
थजाःगु अवस्था सायद नेपाःया फुक्क थासय् जुयाच्वंगु दु । तर ठेक्केदारयात धाःसा थुकिं छुं हे लिच्वः लानाच्वंगु मदु ।
थ्व हे झ्वलय् गृहमन्त्री रामबहादुर थापा बादलं नकतिनि हे जक इलय् हे ज्या क्वमचाय्कूपिं ठेकेदारतय्गु धलः दय्काः न्हापां भिनेगु नितिं ह्वःताः बीगु व उकियात नं अटेर यात धाःसा जेलतकं तय्गु नितिं निर्देशन बियादीगु दु । थीथी मन्त्रालयया सचिव, प्रहरी प्रमुख, येँ, यलया प्रमुख, स्वंगू हे जिल्लाया प्रमुख जिल्ला अधिकारीयात मुँज्याय् सःताः उकथं निर्देशन बियादीगु खः ।
नापं जिल्ला स्तरय् न्ह्याकाच्वंगु विकास निर्माणया ज्या, आयोजना, परियोजनाया अनुगमन याय्त व इलय् हे ज्या क्वचाय्के मफूगु ठेकेदार व फर्मया सूचं तयार यानाः छ्वया हय्त तकं निर्देशन बियादीगु दु । धात्थें धाय्गु खःसा विकास निर्माणय् जक हरेक क्षेत्रय् न्ह्याकेमाःगु पलाः खः थ्व । थुकिया अभावं वा लापरवाहीं यानाः हरेक क्षेत्रय् भ्रष्टाचारया नितिं ग्वाहालि जुयाच्वंगु दु । नापं थुकिया लिच्वः जनतां फय्मालाच्वंगु दु ।
निश्चित रुपं गृहमन्त्रीं न्ह्याकादीगु पलाखं विकास निर्माणया ज्याय् जुयाच्वंगु बेथिति व लापरवाहीयात छुं हदतक म्हो याय्त ताःलाइ । थजाःगु पलाःयात लसकुस जक मखु, सचेत नागरिकतय्सं तिबः बिल धाःसा बांमलाःगु नियतं ज्या यानाच्वंपिं ठेकेदार, फर्मत हतोत्साही जुइ ।
