२०७७ माघ ५, सोमबार

​बागमतीया जग्गा खालि हे याय्माः

जुजुमान महर्जन
 
 
येँ महानगरपालिका वडा ल्याः ३१य् च्वंगु आलोकनगरय् वंगु आइतवाः सरकारी जग्गाय् बहालवाला भूमिसुधार मन्त्री पद्मा अर्याल, वडा अध्यक्ष नारायणप्रसाद भण्डारीलिसेंया ब्यक्तित वनाः अन सरकारी जग्गा खः धकाः कित्ताया ल्याः नं दुथ्याका साइनबोर्ड तय्गु ज्या जुल । बागमती खुसी सिथय् जक मखु, स्वनिगःया आपालं खुसि सिथय् तथाकथित सुकुम्बासीतसें जग्गाय् टहरा दनाः दँबदँ लिपा अन जस्तापाता चाःहिकाः अले दुनेदुने पक्कि छेँ दय्काः च्वना वयाच्वंगु सकस्यां खंगु हे जुल । थ्व सामान्य घटनाथें जुइधुंकल, स्वनिगःबासीयात । 
 
थजाःगु ज्याखँय् सरकारया ध्यानाकर्षण इलय्ब्यलय् याकेगु ज्या जूसां राजनीतिक आडय् उमित थनेफूगु मदुनि । अखतं अनया तथाकथित सुकुम्बासीतसें थीथी शक्ति छ्यलाः उगु थाय्या लालपूर्जा तकं दय्काः थःगु जग्गा धकाः दावी याना वयाच्वंगु दु । 
 
थजाःगु हे हर्कत हाकनं छक्वः वंगु आइतवाः आलोकनगरय् जूगु खनेदत । सरकारी जग्गा धकाः ढड्डा हे ज्वनाः मन्त्री अर्यालं सरकारी जग्गा धकाः दावी यानाच्वंगु इलय् अनया स्थानीयबासीतसें थःगु जग्गा धकाः लालपूर्जा क्यनेगु ज्या जुल । छगूकंया तनाबया स्थिति ब्वलनाच्वंगु अवस्था खः, निजी व सरकारी जग्गा धकाः । 
 
खय्त ला आपालं सरकारी जग्गा व्यक्तिया नामय् हयाच्वंगु खँ असामान्य मखु, जब कि येँया बालुवाटारया जग्गा तकं ब्यक्तिया नामय् हय्त ताःलाःपिंन्सं राजनीतिक लिधंसाय् खुसि सिथय् जुइमा, वा पुखू हे छाय् मजुइमा, मनूतसें थःगु नामय् हयाः भोगचलन यानाच्वंगु सकस्यां स्यूगु हे जुल । 
 
अझ ऐतिहासिक पुखू हे ब्यक्तिया नामय् हे कम्प्लेक्स हे दय्केगु ज्या व उकिया विरोधया बाबजूद नं स्थानीयबासीत ताःमलाःगु खँयात काय्बलय् शक्तिया लिधंसाय् मनूतसें न्ह्याग्गु नं याइ धइगु थुइकेत बाध्य जुयाच्वंगु दु । थजाःगु हे इलय् सरकारी जग्गा अतिक्रमण जुयाच्वंगु अवस्थाय् हाकनं सरकारं थजाःगु जग्गाय् साइनबोर्ड हे तयाः लित काय्गु गुगु पलाः न्ह्याकूगु खः, व तसकं हे च्वछाय्बहःजू ।
 
थौंकन्हय् स्वनिगःया खुसि सिथय् सुकुम्बासीया नामय् आपालं सरकारी जग्गाय् थजाःगु टहरा दय्काः च्वना वयाच्वंगु दुसा सरकारं थजाःगु जग्गा लितकयाः खुसिया सौन्दर्य थकाय्गु वा अप्वय्केगु ज्या याय्माः । स्वनिगःया सभ्यताया केन्द्र विन्दु धकाः बागमती खुसि धाय्गु याःसां नं थौंकन्हय् बागमती खुसि छगू धःया रुपय् हिला वनाच्वंगु खायूगु सत्य खः । 
 
उलि जकमखु, बागमती सिथय् दय्कातःगु आपालं फल्चा, सतः, देगः आदि थेंजाःगु सम्पदाय् तकं मनूतसें अतिक्रमण यानाः अनया सौन्दर्ययात स्यंकाच्वंगु जक मखु, ज्यूतलय् च्वनेगु, अले स्यन धाःसा अनं दनाः मेथाय् वनेगु ज्यातकं जुयाच्वंगु दु । थजाःगु अवस्थाय् नं राजनीतिक हुनिं छुं याय् फयाच्वंगु मदु । थुकिया दसूकथं टेकू दोभाननिसें थापाथली कालमोचनतकया सम्पदायात काय्फु ।
 
डा. बाबुराम भट्टराई प्रधानमन्त्री जुयाच्वंगु इलय् नं बागमती सिथय् दय्कातःगु थजाःगु टहरा चीकेगु ज्या जूगु खःसां नं व ज्या ताःलाय् मफुत । थुकियात कयाः राजनीतिक व्यक्तिपिन्सं हस्तक्षेप यानाः ज्या ताःमलात । तर थौंकन्हय् सरकारी जग्गा लित हय्गु अभियान सरकारं हे न्ह्याकाच्वंगु इलय् थजाःगु बांलाःगु ज्यायात कयाः सकस्यां समर्थन याय् हे माः । 
 
यदि सरकारी जग्गायात मनूतसें लालपूर्जा दय्काः उपभोग यानाच्वंगु खःसा, उगु जग्गाय् ब्यक्तिया नामय् हय्त ज्या याःपिं मालपोत, गुथिया तत्कालीन कर्मचारी÷पदाधिकारीपिन्त नं कारवाही याय्माः । 
 
थुकथं ज्या जूसा जक मनूतसें हाकनं सरकारी जग्गा काय्गु कुतः याइमखु । सरकारं दीर्घकालीन पलाः न्ह्याकाः यदि ज्या मयाइगु खःसा जनतां बालुवाटार व मातातीर्थया जग्गा प्रकरणयात मत्थर याय्गु वा जनताया ध्यान मेखे छ्वय्गु ज्या जक खः धकाः थुइकेत बाध्य जुइ ।