महानगरपालिकाया छगू च्वछाय्बहःगु पलाः
जुजुमान महर्जन
नेपालभाषाया मान्यता बीमाः धकाः सः थ्वय्कूसां थुकियात कयाः सरकारं खास हे च्यूताः तयामच्वंगु अवस्थाय् थुकिया छ्यलाबुला स्थानीय तहपाखें हे जुइमाः धइगु सः थ्वया वयाच्वंगु खः ।
थुकियात कयाः न्हापां येँया महानगरपालिकाया तत्कालीन प्रमुख केशव स्थापितं स्थानीय तगिमय् ज्याखँया भाषा नेपालभाषा याय्गु निर्णय याःगु इलय् बर्मूतय्सं खस नेपाली भाषाया अस्तित्वय् लिच्वः लाकिन धकाः सर्बोच्चय् रीट तयाः थुकियात खारेज यानाब्यूगु खः । व लिपा नेपालभाषायु यक्व हे आन्दोलन जूसां थुकियात खास हे उपलब्धिपूर्ण लिच्वः धाःसा पिहांवःगु मदुनि ।
थुकियात कयाः गबलें नेतृत्व पक्तिं हे विचलन वःगु खनेदुसा सरकारपाखें नं थुकियात कयाः बेवास्ता यानाच्वंगु खः । अथे खःसां इलय्ब्यलय् नेपालभाषायात सरकारी ज्याखँय् छ्यलाबुलाय् हय्गु नितिं थाय्थासय् सः तय्गु याना वयाच्वंगु दु ।
थ्व हे झ्वलय् आः वयाः स्थानीय तगिमय् नेपालभाषायात नं मान्यता बीकथं महानगरपालिकालिसें थीथी नगरपालिकां नं ज्या न्ह्याकाहःगु खनेदु । अथे हे जनप्रतिनिधिपिन्सं नं थःगु मांभासं सपथ ग्रहण याय्गु ज्या नं जूगु दु । थुकियात नं छगूकथं उपलब्धि हे खः धाःसां पाइमखु ।
स्थानीय तगिमय् जुइगु ज्याझ्वलय् जक मखु, नकतिनि येँ महानगरपालिकापाखें जःलाखःला देय् भारतया प्रधानमन्त्री नरेन्द्र मोदी नेपाः भ्रमणया झ्वलय् अभिनन्दन याःगु इलय् ‘अभिनन्दन पौ’स नेपालभाषा, नेपाल सम्बत्लिसें रञ्जना लिपि छ्यलेगु ज्या जुल, उकियात कयाः सकस्यां च्वछाय् हे माः ।
अभिनन्दन पतिइ विशेष यानाः रोमन लिपि व देवनागरी लिपि जक छ्यलेगु याना वयाच्वंगुलिइ थजाःगु महत्वं जाःगु अभिनन्दन पतिइ रञ्जना लिपि, नेपालभाषा व नेपाल सम्बत् छ्यलेगु चाःचू खँ मखु । अथे हे अभिनन्दन पौया ब्यहोरा दुगु सफूचाय् नं नेपालभाषां अनुवाद यानातःगुयात नं नेपालभाषायात छ्यलाबुलाय् हय्गु छगू महत्वपूर्ण पलाः खः ।
नेपाल सम्बत्यात सरकारं राष्ट्रिय मान्यता बीधुंकूगु खः । अथे हे थुकिया छ्यलाबुलाया नितिं सरकारं प्रतिबद्धता प्वंकूसां उकियात कार्यान्वयन धाःसा आःतक याःगु मदुनि । थजाःगु
अवस्थाय् मेमेगु सम्बत्लिसें नेपाल सम्बत् छ्यलेगु धइगु नं महत्वपूर्ण खँ खः ।
उलि जक मखु, भारतीय प्रधानमन्त्री नरेन्द्र मोदीयात लसकुस याय्गु नितिं तयातःगु ब्यानर नं नेपालभाषां च्वयातःगु दु । नेपालभाषायात थुकथं छ्यलेगु ज्यापाखें नेपालभाषाया आन्दोलनयात हे न्ह्याकेगु नितिं छगूकथं तिबः जूवनीगु खँय् निगू मत दइमखु ।
नेवाःतय्सं हे नेपालभाषा त्वःता वनाच्वंगु इलय् थजाःगु ज्यायात निरन्तरता बियावनेमाःगु आःया आवश्यकता खःसा झीसं नं थःगु मांभाय्यात गुकथं छ्यलेफइ व खँ जक मखु, ज्या याना हे क्यनावन धाःसा झीगु हक अधिकारया आन्दोलन याकनं हे ताःलाइ धइगु आशा याय्फइ ।
