२०७८ कार्तिक १०, बुधबार

​वृद्धभत्ता

बाबुकाजी सुवाल
 
 
चयेदँ दुम्हः सन्तवीर बाज्यां सुथसिया न्याता ईलय् हे प्राण त्वःतुगु   जुयाच्वन । बहनिसिया झिताः ई जुइ धुंकल । वइत मिँ तइम्हः तःधिम्हः काय् भाजु  महन्तवीर येँया होटलं लिहाँ मवगुलिं घाटय् यंके मखना च्वन । 
 
महन्तया येँ तःधंगु होटल दु । वया सुथय् दंसानिसें बहनि लिबाक्क तक लि हे लाइगु मखु । अथे जूगुलिं व येँ हे च्वनिम्हः । व मथ्यंगुलिं सकलें व वइगु लँ स्वया च्वन ।
 
झिंछताः ई जुइक लिहाँ वल । महन्त थ्यनेवं सकलें सन्तवीरयात घाटय् यंकेत हथाय् चाल ।
 
छेँय् थ्यंका महन्तं मिखाय् ख्वबि छक हे मतसें वसः त्वःत त्वःतुं कलाम्हेसित धाल, “ बा छन्हु न्हापं मन्तका ख ला? गाविसं कन्हय् वृद्धभत्ता बिइगु मखु ला ?“
 
वैगु खँ न्यना कलाम्हेसिनं खः धैकथं छ्यँ संकल । अन मुनाच्वंपि मनूत अजु चाया वं वैगु वं वैगु ख्वालय् स्वया छुं न मधासे महन्त यागु ख्वाः स्वया त्वालां जुया च्वन।