२०७७ माघ १२, सोमबार

​​​संसद विघटनया स्थितीतक्कआः गज्याःगु मोड काइ

काजी
 
देय्या राजनीतिं न्हूगु व गम्भीर मोड काःगु दु । छगू दलया निम्ह अध्यक्षपिनि दथुइया द्वन्द्वं यानाः मुक्कं देय् हे गम्भीर मोडय् थ्यंगु दु । निम्हेसिया ल्वापुया परिणाम थौं मुक्कं नेपाःमिपिन्सं फय्माःगु स्थिती वःगु दु । सत्तारुढ दल नेकपाया नायः लिसें प्रधानमन्त्री केपी शर्मा ओली व कार्यकारी नायः पुष्पकमल दाहाल दथुइया तिक्तता, द्वन्द्व थहांवँवं जनमतयात हे तिलाञ्जली बियाः संसद विघटन याय्गु स्थिती तक थ्यंनाबिल । थ्व अवस्थाय् निम्हं पार्र्टी नायःपिं लिसें देय्या राष्ट्रपतियात तक नं न्ह्यसः दंगु दु । उकिया नापं राष्ट्रपतिया भूमिकाप्रति नं नकारात्मक टिप्पणी अप्वयावःगु दु । 
 
सरकारपाखें धाय्गु खः अथवा प्रधानमन्त्री ओलीपाखें, संसद विघटनया गुगु पलाः ल्ह्वन, उकियात कयाः प्यखेरं विरोध जुयाच्वंगु दु । नेपाली काँग्रेस, जनता समाजवादी पार्टी, साझा विवेकशील लगायतया थीथी दलं प्रधानमन्त्रीया थुगु पलाःया विरोध याःगु दु । राप्रपां निर्वाचनयात समर्थन याःसां संसद विघटनया निर्णयया विरोेध याःगु दु । मेगु दलं ला विरोध याःगु असामान्य मखुत । 
 
तर स्वयम् सत्तारुढ नेकपा दुने हे नं थुगु निर्णयप्रति चरम असन्तुष्टि खनेदु । प्रधानमन्त्रीया थुगु पलाःयात खुल्ला रुपं विरोध यासें न्हय्म्ह मन्त्रीतय्सं ला राजीनामा हे बीधुंकल । शिक्षा विज्ञान तथा प्रविधि मन्त्री गिरिराजमणि पोखरेल, उर्जा जलश्रोत तथा सिचाईँ मन्त्री वर्षमान पुन, कृषि तथा पशुपंक्षी विकास मन्त्री घनश्याम भुसाल, संस्कृति पर्यटन तथा नागरिक उड्डयनमन्त्री योगेश कुमार भट्टराई, वन तथा वातावरणमन्त्री शक्तिबहादुर बस्नेत, श्रम तथा रोजगारमन्त्री रामेश्वर राय यादव, खानेपानी तथा सरसफाइमन्त्री वीना मगरं प्रधानमन्त्रीया पलाःयात जनादेश अःखः व राजनीतिक मूल्य व स्थिरताया प्रतिकुल जुइगु कथं ल्ह्वंगु पलाः धासें उकिया विरोधय् मंकाः राजीनामा ब्यूगु खः । उलि जक मखु, 
 
निर्वाचन धुंकाः देशय् दुई तिहाईया बहुमत दुगु बल्लाःगु सरकार वल । अप्वःथे नेपाःमि जनतां बल्लाःगु सरकारं देय्या कायापलट हे याइथें आश याःगु खः । देय्या हितय् छुं याइ धइगु अप्वःसिगु आशा खः । व आशा ब्वलंगु धइगु हे देय्या निगू तःधंगु शक्ति छधी जूगुलिं नं खः । समानता, समावेशीया सः ज्वनाः परिवर्तनया नितिं धकाः झिदँ मल्याक्क सशस्त्र युद्धय् कुब्वाःगु लिसें न्हापांगु संविधानसभाया चुनावय् दक्कले तःधंगु शक्ति जूगु प्रचण्ड नेतृत्वयागु माओवादी पार्टी व स्थानीय लिसें संसदीय चुनावय् दक्कले तःधंगु शक्ति जूगु नेकपा एमाले छधी जुयाः नेकपा जूबलय् सकलें आशावादी जूगु खः । तर दल छधी जूसां बिचाः छधी जुइमफूगुया लिच्वः थौं झीसं खनाच्वनागु दु । 
 
उलि जक मखु, नेकपा पार्टीपाखें पार्टी अध्यक्ष ओलीयात अनुशासनया कारवाही याय्गु तकंया निर्णय याय्धुंकल । ओलीया थुगु पलाःया विरुद्ध सत्तारुढ नेकपां प्रमुख प्रतिपक्षी दल नेपाली काँग्रेस व प्रतिपक्षी दल जनता समाजवादी पार्टीलिसे जानाः संयुक्त प्रतिवाद याय्गु तकंया निर्णय नं याय्धुंकल । छगू दल सत्ताय् थ्यनीबलय् मेगु दलं विरोध याइगु ला जुयावःगु खँ जुल । तर थःगु हे दलया सरकार विरुद्ध आन्दोलन जुइत्यंगु थ्व न्हापांगु खुसी हे जुइमाः । 
 
निम्ह नायःपिनि द्वन्दया लिच्वः मुक्कं नेपाःमिं फयाच्वनेमाःगु स्थिती बांलाःगु पक्कां मखु । न्हापा पार्टी विभाजनया स्थिती जक खनेदयाच्वंगुलिइ आः मुक्कं नेपाःमि हे थुगु विवादय् काःगु दु । जनतां मत ब्यूगु धइगु थज्याःगु स्थिती ब्वलंकेत मखु, दलीय राजनीति याय्त पक्कां मखु । तर आः दलीय राजनीति, गुट उपगुटया राजनीति थुलि तक्क अप्वय्धुंकल कि गणतन्त्र देशय् प्रतिगामी शक्तिं छ्यं ल्ह्वनाहय्धुंकल । मेपिं ला मेपिं, देय्या राष्ट्रपति तकं थ्व गुट उपगुटया राजनीतिइ विवादित जूगु अवस्था धइगु गम्भीर खः । 
 
मेपिन्सं विरोध यानाच्वंगु च्वनं जुइगु, ओलीपाखें वनीगु छुं नं प्रस्ताव तुरन्त अनुमोदन यानाछ्वय्गु ज्या राष्ट्रपतिपाखें जुइमज्यूगु हे धाय्माः । विवादयात मत्थर याय्त मध्यस्थता याय्गु ज्या याय्माःम्ह राष्ट्रपतिं थ्वयां न्ह्यः नं ओलीपाखें प्रस्ताव यानाकथं संवैधानिक परिषदसम्वन्धी अध्यादेशयात पारित यानाः नेकपाया विवादय् मिइ घ्यः लुइगु ज्या थें जूगु आपाःसिगु विश्लेषण दुसा आः वयाः संसद विघटन थज्याःगु गम्भीर प्रस्ताव तकं याउँक हे पास यानाबिल । थुकिं यानाः राष्ट्रपति थज्याःगु गरिमामय पद विवादित जूगु अवस्था जूगु दु । 
 
गबलें प्रचण्डया १९ बुँदे राजनीतिक प्रस्तावया नामय् सा गुबलें ओलीपाखें प्रचण्डया राजनीतिक प्रस्तावया ३८ बुँदे प्रत्युत्तरया नामय्, गबलें संवैधानिक परिषदया नामय् सा गबलें विशेष अधिवेशन आव्हानया खँय् निम्ह नायः दथुइ विवाद जुया हे च्वन । व थ्व विवादय् शक्ति सुया ल्हातय् बीगु वा तय्गु धइगु वहसं जक प्राथमिकता कयाच्वन । थौं नेपाः देय् जक मखु, मुक्कं गम्भीर मोडय् लानाच्वंगु दु । कोभिड १९ संक्रमणया जोखिम, लकडाउन अर्थतन्त्रय् लाकूगु लिच्वलं यानाः ततःधंगु विकसित देय् तकं वाथावाथा कनाच्वंगु अवस्था दु । 
 
गुलिखे यूरोपियन देशय् ला संक्रमणया स्वंगूगु लहरं त्राहि त्राहि जुयाच्वंगु दु । मुक्कं हलिंया ध्यान संक्रमण नियन्त्रण, भ्याक्सिन, क्वदलाच्वंगु अर्थतन्त्रयात थकाय्गुलिइ केन्द्रीत जुयाच्वंबलय् नेपालय् थुकथंया स्थिती धइगु बांलाःगु पक्कां मखु ।