‘ओलम्पिक भिलेज’ दुने कोरोना संक्रमित लुत
दिल्लाथ्व नवमी ११४१,साउन ३ आईतवाः
टोकियो ओलम्पिकया ‘ओलम्पिक भिलेज’ दुने कोरोना संक्रमित लूगु दु । ओलम्पिक ग्वसाःखलकं म्हिगः ओलम्पिक भिलेजदुने कोरोना संक्रमित लूगु पुष्टि याःगु दु ।
ओलम्पिकय् ब्वति कायेत विदेशं वःपिं मनूतय्के कोरोना संक्रमण लूगु धागु दु । टोकियो ओलम्पिक औपचारिक रुपं न्ह्यायेत आः ६न्हु जक ल्यंदनि । तर भिलेजदुने कोरोना संक्रमण पुष्टि जुइवं ग्वसाःखलःयात च्यूताः जूगु दु ।
कोरोना संक्रमित कासामि मजूसें कासा ग्वसाःखलकय् दुथ्याःम्हेसित कोरोना जूगु धागु दु । ग्वसाःखलकं कोरोना संक्रमितया म्हसीका सुचुकातःगु दु । कोरोना संक्रमण खनेदयेवं वय्कयात ओलम्पिक भिलेजं आइसोलेसनय् तयेयंकूगु दु ।
टोकियो ओलम्पिक जुलाई २३ निसें अगस्ट ८ तारिखतक जुइ । ओलम्पिकय् नेपालं स्वीमिङय् निम्ह अले एथ्लेटिक्स, जुडो व शुटिङय् छम्हछम्ह कासामिपिन्सं धेंधेंबल्ला याइ ।
Categorized in कासा
