२०८० चैत्र १५, बिहिबार

‘केहें किजापिन्त मतिनाया पौ’ सफू पितब्वज्या

लहनान्युज | चौलागा चर्तुदशी ११३८ (अप्रिल १५ २०१८)

बरिष्ठ च्वमि बुद्ध शाक्य नेवाःजुया झिगूगु कृति ‘केहेँ किजापिन्त मतिनाया पौ’ शनिवाः सातोआकी भवन कुपण्डोलय् मूपाहाँ शताब्दी पुरुष संस्कृतिविद् सत्यमोहन जोशीं पितब्वज्या यानादीगु दु ।
 
 
थ्व स्वयां न्ह्यः च्वमि शाक्यया पुजाभः (काव्य), कल्पवृक्ष (काव्य), याकः मिसाया भुजायाः (लघु काव्य), चेतन गजल (गजल मुना), मनया लसता (म्ये मुना), वंचुगु सर्ग (हाइकु मुना), स्वकचा (हाइकु मुना), गोयन्का गुरु लुमना (लुमन्ति), धकिं दुनेया किपा व ‘छगू जिगु भिन्तुना’ नां या म्येचाःनं पिदने धुंकूगु दु ।
 
 
भूपु मेयर बेखारत्न शाक्यया नायःसुइ अमिर मैया रञ्जितं न्ह्याःकूगु उगु ज्याझ्वलय् सफूति दुथ्याःगु ५० पु पौया विषयवस्तुबारे दुग्यंक चर्चा जूगु खःसा पाहाँ कथं झायादीम्ह भाषासेवी नापं नेतृत्व वर्ग डा. केशव मान शाक्यं पौया माध्यमं नं बैज्ञानिकत म्हसीकेगु व नैतिक शिक्षा नापं ज्ञान बिइफइगु खँ थुगु सफुतिं क्यनाब्यूगु न्ह्यथना दिल ।
 
डब्लु एन ओ नेपाः च्याप्टरया नायः शाक्य सुरेनं भाषा व जातिया सेवा यायेत उमेरं मपनीगु खँ बुद्ध नेवाः नं क्यनाब्यू कनादिल । इलोहँया सम्पादक नरेशवीर शाक्यं सेल्लाःगु साहित्य सृजनायायेत डीग्री हासिल यायेहे माःधैगु मदु, स्वअध्यन जक दुग्यंक यात धाःसानं गागु थुगु सफुतिं प्रमाणित याःगु खँ धयादिल ।
 
 
प्रकाशकपिं डा. सचेतन मान तुलाधर, डा. पवित्रा शाक्य तुलाधर व लसता तुलाधरपिन्सं छ्वयाहयादीगु भिन्तुना पौ ब्वंसें प्रो. सर्वज्ञमान तुलाधरं लसकुस न्वचू बियादीगु उगु ज्याझ्वलय् मूपाहाँ जोशीं सफूया बांलाःगु पक्ष ला दहे दु अथे खयाःनं मगाःगु मचाः खँयात कुलादीगु दुसा सफूया समिक्षा नेपालभाषा परिषदया नायः सुवर्ण शाक्यं यानादीगु खः ।
 
 
नेपालय् सामान्यतया केहेँ किजापिन्त शिक्षा बिइबलय् आदेश मुलक तरिकां बिइगु याना वयाच्वंगु खः, तर थुगु सफुतिं थः स्वयाः क्वकालिपिन्त नं ज्ञान बुद्धि धैगु मतिनापाखें बिइफैगु क्यनाब्यूगु खँ धयादिल ।
 
 
बुखँ  नेवाः सूचना केन्द्र
 
किपा  राजेन्द्र रञ्जित
 
 
Categorized in राष्ट्रिय