‘जमाना मभिं स्व’ पिदन (भिडियाेनापं)

भाजु – हिसिदुम्ह मय्जु नक्कल यानाः न्याकुं कयाः जुइमते ‘जमाना मभिं स्व’
मयजु – सुं मदु ख्यलय् वयेमते ल्यूल्यू खँल्हाइ मनूतयसं ‘जमाना मभिं स्व’

 

थजाःगु हे न्ह्याइपुगु खँल्हाबलां ब्याःगु नेपालभाषाया ज्वःम्ये ‘जमाना मभिं स्व’ छगू ज्याझ्वः यासें प्रेमियर जूगु दु । बुदिंया भिंतुना म्ये कासाया उत्कृष्ट कासामि रोविनसन कंसाकार व सुमन मानन्धरं हालादीगु थुगु म्ये बुदिंया म्ये हालामि, च्वमि, संचारकर्मी सुरजवीर बज्राचार्यं च्वयादीगु खःसा बुदिंया भिंतुना म्ये संगीत संयोजन यानादीम्ह जूगल डंगालया हे संगीत व संगीत संयोजनया गुण जाः । थुगु म्ये आर्टोम्यूज रेकर्डिङ स्टुडियोय् रकर्ड जूगु खः ।

 

वरिष्ठ सिने पत्रकार विजयरत्न असंबरे उलेज्या यानादीगु थुगु म्ये हाइलाइट्स नेपालपाखें सार्वजनिक जूगु खः ।

लोकंह्वाःम्ह कलाकार आराध्यलक्ष्मी खड्गीया निर्देशननापं अभियन दुगु थुगु म्येय् वयकःयात रुपेन्द्र श्रेष्ठ ‘थक्वा’ भाजुं साथ बियादीगु खः । बिगः बजेट धयातःगु थुगु म्यूजिक भिडियोया कन्सेप्ट व प्रस्तुतिइ नं न्हूपहः लू । भिडियोय् चिरिबाबु महर्जन, रमेश पौडल व राजकुमारी श्रेष्ठं नं म्हितादीगु दु ।
छायाँकन, सम्पादन व रंग संयोजन सोहन मानन्धरं यानादीगु थुगु म्यूजिक भिडियोय् समाया ज्या पूजा शाही व निरु महर्जनं यानादीगु खःसा ड्रोनया भाला सनी शाक्यं पूवंकादीगु दु ।

 

यूट्युबय् अतिकं तारिफं जाःगु कमेन्टं दुथ्यानाच्वंगु व स्वकुमिपिनिगु लसता व हःपालं जाःगु प्रतिकृयां उत्साह तनाब्यूगु खँ कलाकार अले निर्देशक आराध्यलक्ष्मीं कयादीगु दुसा म्येहालामिपिं रोविनसन कंसाकार व सुमन मानन्धर नं अतिकं उत्साहित जुयागु खँ न्ह्यथनादीगु दु ।

 

म्ये स्वयेत थन क्लिक यानादिसँ ।

 

Categorized in मनोरन्जन