बायर्न म्युनिखं लिपजिगयात बुकूसें ‘जर्मन कप’या उपाधि त्याकूगु दु ।

 

सञ्चरवाः चान्हय् जूगु कासाय् बायर्न म्यूनिखं लिपजिगयात स्वंगू गोलं बुकूसें उपाधि त्याकेत ताःलाःगु खः । उपाधि त्याकेगु झ्वलय् बायर्नया नितिं रोबेर्टो लेवान्डोस्र्कीं २गू गोल याःगु खःसा किंग्स कोम्यानं १गू गोल याःगु खः ।

 

कासाया २९गूगु मिनेटय् लेवान्डोस्कीं गोल यासें बायर्नयात १गू गोलं न्ह्यःने लाकूगु खः । न्हापांगु हाफय् १गू गोलं न्ह्यःने लाःगु बायर्नं निगूगु हाफय् थप २गू गोल यायेत ताःलाःगु खः । कासाया ७८गूगु मिनेटय् कोम्यानं गोल यासें बायर्नयात २गू गोलं न्ह्यःने लाकूगु खः ।

 

तसकं आक्रामक कासा म्हितूगु बायर्नं कासाया ८५गूगु मिनेटय् मेगू गोल तनेत ताःलात । थ्व इलय् नं लेवान्डोस्कीं हे गोल यात । लेवान्डोस्कीया ब्यक्तिगत निगूगु गोलया नापनापं बायर्नं जर्मन कप फुटबलया उपाधि त्याकूगु खः ।