‘जिं धयागु मेकथं थुइकल’–मल्ल
लहनान्यूज | चौलागा एकादशी ११३७ (अप्रिल २२ २०१७)
नेवाः देय् दबूया संरक्षक लिसें नेवाः न्ह्यलुवा मल्ल के. सुन्दरं म्हिगः नेवाः देय् दबूया खुक्वःगु महाधिवेशनया उद्घाटन सत्रय् नवानागु खँपुयात मेकथं हे थुइकूगु व व्याख्या जूगु धयादीगु दु ।
दाङया घोराहिइ न्ह्यानाच्वंगु देय् दबूया खुक्वःगु महाधिवेशनयात एकताया महाधिवेशन कथं यंकेमाःगुलिइ सहमति मयाकेत स्वइपिं मनूत दयेफुगु खँय् थम्हं सचेत याकागु देय् दबूया संरक्षक मल्ल के. सुन्दरं धयादिल ।
लहनान्यूजलिसे खँ ल्हासें संरक्षक मल्लं सहमति मयाकेत स्वइपिं सु खः थम्हं म्हमस्यूगु धयादिल । अज्याःपिं मनूतयगु चहःपहःयात स्वयाः उमित म्हसिकाः दवाब हे बियाःसां सहमति याना वनेमाःगु वयकलं धयादिल ।
असहमति व विरोधया दथुइ नेवाःतयत विभाजन यानातयेत स्वइपिन्सं हरेक इलय् नेवाःतय् दथुइ गलत सुचं प्रवाह यानाच्वंगु द्वपं नं वयकलं बियादिल । अज्याःपिंपाखें सतर्क जुयाः दबूया खुक्वःगु तःमुँज्यां एकताया सन्देश बीमाःगु खँय् नेवाः न्ह्यलुवा मल्लं बः बियादिल ।
येँया आनन्दकुटिइ जूगु दबूया महाधिवेशनय् नेवाःत विभाजन जूगु लुमंकुसें उगु इलय् असहमति व संगठन विरोधया कारणं तःमुँज्या स्थगित वयकलं जूगु धयादिल ।
संरक्षक मल्ल के. सुन्दरं राष्ट्र निर्माणया ज्याय् नेवाःतयगु महत्वपूर्ण भुमिका दइगु खःसां राज्य संरचनाय् धाःसा नेवाःतयसं छुं हे भूमिका म्हितेमखंनिगु धयादिल । थज्याःगु अवस्थाय् नेवाःत छधी जुइगुया पले मदुगु वयकःया धापू खः ।
Categorized in राष्ट्रिय
