‘ट्रम्पं क्लिन्टनया जीत सुनिश्चित यात’
लहनान्यूज सम्वाददाता | कौलाथ्व सप्तमि ११३६ (अक्टोबर ८ २०१६)
अमेरीकाया भावी राष्ट्रपतिइ हिलारी क्लिन्टनयात डोनाल्ड ट्रम्प थम्हं हे सुनिश्चित याःगु टिप्पणीकारतयसं टिप्पणी याःगु दु ।
अमेरीकाया राष्ट्रपति चुनावय् रिपब्लिकन उम्मेदवार ट्रम्पया सन् २००५या भिडियो सार्वजनिक जुइधुंकाः टिप्पणीकारतयसं ट्रम्पया चुनावी अभियान तकं क्वचाःगु धाःगु खः । ट्रम्पं मिसातयगु बारे आपत्तीजनक टिप्पणी याःगु भिडियो सार्वजनिक जुइधुंकाः हिलारीया जीत सुनिश्चित जूगु टिप्पणीकारतयगु टिप्पणी खः ।
वासिङ्टन पोष्टया वेबसाइटय् सार्वजनिक जूगु भिडियोस ट्रम्पं इहिपा जुइधुंकूम्ह मिसालिसे सेक्सया इच्छा दुगु, मिसातयत थीगु अले किस यायेगु इच्छा दुगु खँ ल्हानातःगु खः । लिसें स्टारं मिसातयत न्ह्यात्थे नं यायेफुगु तकं धाःगु खः ।
ट्रम्पं थःगु टिप्पणीया खँय् क्षमायाचना नं यायेधुंकूगु दु । तर ट्रम्पया क्षमायाचनाय् चिन्ताया भाव हे मदुगुलिं दुनुगलं वःगु मखूगु विश्लेषकतयसं धाल ।
क्षमा फ्वनेगु झ्वलय् ट्रम्पं थःगु खँग्वलं थः सु खः धकाः सीमदुगु धासें क्षमा फ्वंगु खः । लिसें ट्रम्पं उगु खँल्हाबल्हा लकर रुमय् जूगु अनौपचारीक खँल्हाबल्हा खः धासें थःगु बचाउ नं यानादीगु दु ।
Categorized in अन्तर्राष्ट्रिय
