‘ट्राफिक जाम मुक्त जुइकथंया ज्या याय्माल ।’
सुनील महर्जन
यलय् ट्राफिक व्यवस्थापनयात कयाः स्थानीय जनतां तसकं असन्तुष्टि प्वंकूगु दु । महानगरीय प्रहरी प्रभाग मंगलबजारं यल दरबार क्षेत्रय् ग्वसाःग्वःगु नागरिक सुनुवाइ ज्याझ्वलय् ब्वति कयादीपिं अप्वः धइथें स्थानीय बासीं उकथं असन्तुष्टि प्वंकादीगु खः ।
ज्याझ्वःया शुरुवाटय् प्रभागया प्रमुख नापं प्रहरी निरीक्षक प्रकाश थापां प्रभागं बिया वयाच्वंगु सेवा, शान्ति सुरक्षाया सवालय्, जनमैत्री प्रहरी प्रशासन लिसें संस्कृति व सम्पदा संरक्षणय् प्रहरीया भूमिका विषयस सनुवाइ याय्गु धयातःगु खः ।
तर सुनुवाइलय् यल महानगरपालिकाया प्रमुख चिरीबाबु महर्जनया उपस्थितिं यानाः सर्वसाधारणया अप्वः धइथें गुनासो, समस्या, न्ह्यसः व आलोचना महानगरपालिकालिसें ट्राफिक व्यवस्थापनया समस्याय् केन्द्रीत जुल ।
स्थानीयबासीं ट्राफिक जाम, ट्याक्सीं लाथेपाथे शुल्क म्हइगु, सांस्कृतिक व पर्यटकीय नगरीइ ट्राफिक जामं लाकूगु लिच्वःयात कयाः ट्राफिक प्रहरी व यल महानगरपालिकां बेवास्ता यानाच्वंगु न्ह्यथंगु खः ।
थुकथं गुनासो याःपिं यल महानगरपालिका वडा नं. १९य् दलित मिसा कोटाय् निर्वाचित जुयादीम्ह देवकी नेपाली नं खः । वडा दुजः नेपालीं ला ट्राफिक जामं तसकं हे दुःख स्यूगु नं धयादीगु दु । ‘छुं महिना न्ह्यः लगनख्यलय् फुटपाथया पसः चीकल ।
हुल भचा म्हो ला जुल । तर आः स्वय्गु खःसा ट्राफिक जामं सर्वसाधारणपिं हैरान जुयाच्वनेमाःगु अवस्था दु ।’ वय्कलं धयादीगु दु ।
यल महानगरपालिकालिसे ट्राफिक जाम म्हो याय्त पूच्वय् लच्छिया दुने ट्राफिक मत धाःगु स्वला फुत नं मतःगु धासें महानगरपालिकाया ज्याखँयात कयाः नं कुंखिनेगु ज्या जुल ।
यल ट्राफिक जाम मुक्त घोषणा लोकप्रियताय् जक सीमित जूगु धयादिसें पट्को टोल सुधार समितिया न्वकू सञ्जयराज शर्मां यल महानगरपालिका व ट्राफिक व्यवस्थायात कयाः असन्तुष्टि प्वंकादिल । ‘घोषणा ला यात, व्यवहारय् थाय् थासय् सतक जाम जुयाच्वंगु दु, थ्व छु खः मेयर ?’ वय्कलं न्ह्यसः तयादीगु दु ।
‘यल लागायात ट्राफिक जाम घोषणा यात, तर महापाल पट्को त्वाःया सतकय् न्हियांन्हिथं घण्टौतक जाम जुयाच्वनी । ट्राफिक व्यवस्थापनया खास हे प्रभावकारी खनेमदु ।’ समितिया न्वकू शर्मां धयादिल । ‘मेगु दिन स्वयां विहिवाः बंगलामुखी द्यःया दर्शन याःवनीपिनिगु भीडं यानाः झन् हे सतक जाम जुइगु याः ।
म्होतिं विहिवाः छन्हु जूसां जाम म्हो याय्माल ।’ ज्याझ्वलय् यल वडा नं. ८ बालकुमारीइ च्वनादीम्ह निना श्रेष्ठं सनिलय् जुइवं भाडाया ट्याक्सीत मिटरय् वनेत माने मजुइगु समस्या दुगु न्ह्यथनादिल । अथे हे लोहल टोल सुधार समितिया नायः पूर्णबहादुर महर्जनं लोलपाखें बालकुमारी वनेगु लँय् सवारीया गति नियन्त्रण मजूगुलिं दुर्घटना अप्वः जुइगु खँय् ध्यानाकर्षण याकादिल ।
‘लँय् गनं स्पीड कन्ट्रोल मजुइगु, गनं लाथेपाथे स्पीड कन्ट्रोल दय्कीगु ? थुकिया नं मापदण्ड दइमखु ?’ महानगरपालिकया प्रमुख महर्जनयात न्ह्यसः तयादिल ।
स्थानीयवासी शम्भुप्रसाद बाराहीं थाय्थासय् तयातःगु सिसिटिभीं ज्या मयाःगु खँ न्ह्यथनादिसें उकी ट्राफिक प्रहरीया ध्यान मवंगुलिं आलोचना यानादिल । ट्राफिक व्यवस्थापनया समस्यायात कयाः सुनुवाइ याय्त जिल्ला ट्राफिक प्रमुख सीताराम हाछेंथुयात सःतूसा नं वय्कः मेमेगु ज्याय् ब्यस्त धासें ज्याझ्वलय् उपस्थित जुयामदी ।
थ्व हे झ्वलय् महानगरीय प्रहरी परिसरया प्रमुख नापं प्रहरी वरिष्ठ उपरीक्षक गणेशबहादुर ऐरं जनतां तयादीगु समस्या परिसरपाखें परिपत्र छ्वयाः ट्राफिक ज्याकुथी छ्वय्गु प्रतिबद्धता प्वंकादिल । वय्कलं प्रहरी जनताया शासक मजूसे मित्र जूगु अवधारणापाखें प्रहरी प्रशासनं ज्या याना वयाच्वंगु नं धयादिल ।
महानगरपालिकाया प्रमुख महर्जनं थःगु भिजनकथं ज्या याय्त थीथी परामर्शदातापाखें अध्ययन जुयाच्वंगु खँ न्ह्यथनादिसें थुगु विषययात कयाः ठोस लिसः बीगु धयादिल । ज्याझ्वलय् महानगरपालिकाया सेवा प्रवाह चुस्त दुरुस्त मजूगु, फोहरमैला व्यवस्थापन प्रभावकारी मजूगु, न्ह्याबलें फ्लाइओभर व मनोरेलया खँ जक ल्हानाः वास्तविक समस्याया समाधानयात कयाः मिखा तिस्सिगु ज्या जुयाच्वंगु गुनासो सर्वसाधारणं याःगु खः ।
महानगरीय प्रहरी प्रभाग मंगलबाःया भवन निर्माण समितिया नायः अजरमान जोशीं लोकप्रिय ज्याझ्वः घोषणा याय्गु जक मखुसे उकियात पूवंकेत टोल सुधार समिति, उद्यमी व्यवसायी, जातीय समाज, प्रहरी प्रशासन व महानगरपालिका समन्वयात्मककथं न्ह्याःवनेमाःगुलिइ बः बियादिल ।
ज्याझ्वलय् मू पाहां वाङ्गमय शताब्दी पुरुष डा. सत्यमोहन जोशीं प्रहरीया मू मन्त्र सत्य, सेवा व सुरक्षाया मर्मयात आत्मसात यासें प्रतिबद्धता प्वंकूगु विषयत पूवंकेमाःगु खँय् बः बियादिल ।
