२०८० चैत्र १६, शुक्रबार

‘थौंकन्हय्’या ६८क्वःगु बुदिं

नृपेन्द्रलाल श्रेष्ठ | बछलागा चर्तुदशी ११३८ (मे १४ २०१८)

नेपालभाषां पिदनाच्वंगु साहित्यिक लय्पौ ‘थौंकन्हय्’या ६८ क्वःगु बुदिं नेपाल प्रज्ञा प्रतिष्ठानय् हंगु दु । ‘थौंकन्हय्’ या ६८ क्वःगु बुदिंया लसताय् चिनाखँ मुना (कविता विशेषाङ्क) पितब्वज्या नं जूगु दु ।
 
 
‘थौंकन्हय्’ लय्पौया सम्पादक÷प्रकाशक रुक्मणी श्रेष्ठया सभाध्यक्षताय् न्ह्याःगु उगु ज्याझ्वलय् वाङमय शताब्दी पुरुषनापं वरिष्ठ संस्कृतिविद् डा. सत्यमोहन जोशी, साहित्यकार यज्ञरत्न धाख्वाः, तिलकप्रकाश कायस्थपिन्त दोसल्लां न्यय्काः हनापौ लःल्हाःगु खः । 
 
 
ज्याझ्वलय् ‘छपाः क्यानभास’ बाखंया नितिं मदुम्ह साहित्यकार श्यामदास प्रजापतियात मञ्जुका स्मृति कोषपाखें ‘प्रयागमान स्मृति नेपालभाषा हःपाः सिरपाः’ लःल्हाःगु दु । उगु सिरपाः वय्कःया कायः निरज प्रजापतिं लःल्हाना कयादीगु खः । 
 
 
साहित्यकार फणिन्द्ररत्न बज्राार्य मूपाहां कथं झायादीगु उगु ज्याझ्वलय् समालोचक पूर्णकाजी ताम्रकारं ‘थौंकन्हय्’ लय्पौयात कयाः न्ववानादीगु खः । अथेहे लुमिन कुमार श्रेष्ठं मञ्जुका स्मृति कोषपाखें नीस्वनातःगु ‘प्रयागमान स्मृति नेपालभाषा हःपाः सिरपाः’यात कयाः नुगः खँ तयादीगु खः ।
 
 
भवानी तुलाधरं न्ह्याकादीगु उगु ज्याझ्वलय् उपस्थित जुयादीपिन्त पुष्प चित्रकारं लसकुस यानादीगु खः ।
 
 
Categorized in राष्ट्रिय