‘निर्वाचनया लिच्वलं छुं नं मपाः’
लहनान्यूज | तछलागा तृतीया ११३७ (जुन २६ २०१७)
वंगु बैसाख ३१ गते क्वचाःगु स्थानीय तहया न्हापांगु चरणया निर्वाचनय् संघीय समाजवादि फोरम नेपाल व नयाँ शक्ति नेपाल पार्टिपाखें मेयर पदया मंकाः उम्मेदवार पवित्र बज्राचार्यं निर्वाचनया लिच्वलं थःत छुं नं पाःगु मदुगु धयादीगु दु ।
पवित्र बज्राचार्य ग्वाहालि पुचःया ग्वसालय् थौं येँय् जूगु सुभाय् देछा ज्याझ्वलय् बज्राचार्यं निर्वाचनय् थः व्यक्ति दनागु मखसें मुद्दायात स्थापित यायेत जक न्ह्याःवयागु स्पष्ट यानादिल ।
नेवाः मुद्दाय् थः न्ह्याब्लें क्रियाशिल जुयाच्वनेगु धासें वयकलं थः निर्वाचनया लिच्वलं निराश जुइमखूगु धयादिल ।
थम्हं उम्मेदवारी बीधुंकाः मेपिं उम्मेदवारपिन्सं तक नं पहिचानया छुं छुं मुद्दा ज्वनेत बाध्य जूबलय् हे थः त्याःगु सरह जुइधुंकूगु वयकलं धयादिल ।
निर्वाचनय् थः मत ब्यूपिं व ग्वाहालि याःपिं सकलसित सुभाय् देछासें बज्राचार्यं नेवाः मुद्दाय् नापं न्ह्याःवनेत आम जन समुदाययात इनाप नं यानादिल ।
नुगः खँ तयेगु झ्वलय् ग्वाहालि पुचःया कजि डा.महेशमान श्रेष्ठं राज्यपक्षं नेवाःतयत न्ह्याबलें हे झंगः ल्हाना वयाच्वंगु धासें थःगु अधिकार प्राप्तिया नितिं नेवाःत सचेत जुयाः सडकय् कुहांवयेमाःगु धयादिल ।
नेवाः भुमि स्वनिगलय् विकास निर्माणया नामय् नेवाःतयत हे विस्थापित यायेगु ज्या राज्यसत्तां यानाच्वंगु डा.श्रेष्ठया धापू खः । अथे हे ग्वाहालि पुचःया दुजः देवदास मानन्धरं स्थानीय तहलय् स्थानीय मातृभाषा शिक्षा अनिवार्य यायेमाःगु खँय् बः बियादिल ।
वरिष्ठ पत्रकार सुरेश किरण मानन्धरं मेमेगु निर्वाचनय् उम्मेदवार त्यानाः नं मुद्दा बुनाच्वनीगु सन्दर्भय् थुगु निर्वाचनय् पवित्र बज्राचार्यया उम्मेदवारी धाःसा फरक जूगु धयादिल । थुगु निर्वाचनय् पवित्र बज्राचार्य व्यक्ति मत्याःसां मुद्दा धाःसा वयकःयागु हे त्याःगु मानन्धरं धयादिल ।
नयाँ शक्ति पार्टि येँ महानगरपालिकाया ल्यू कजि अनुप सिंह सुवालं वंगु स्थानीय तहया निर्वाचनय् थः उम्मेदवार बुत धकाः बिचाः यायेगु धइगु हे पहिचान बुत धायेगु सरह जुइगु धयादिल । पहिचानया मुद्दा आःतक्क ल्यं दनिगु धइगु हे थःपिं नं निर्वाचनय् बूगु मदुगु दसि खःगु सुवालया धापू खः ।
