‘नेपाः इजरायल कोरोना इनिसिएटिभ’ नांया समिति गठन
नृपेन्द्रलाल श्रेष्ठ | तछलागा सप्तमी ११४०,जेठ ३० शुक्रवाः
नेपाः व इजरायल दथुइ कोभिड–१९ या ज्ञान व अनुभव कालबिल यायेगु निंतिं छगू समिति नीस्वंगु दु । निगू देय्या चिकित्सक नापं सम्बन्धित अधिकारीत दुथ्याकाः ‘नेपाः इजरायल कोरोना इनिसिएटिभ’ नांया छगू समिति नीस्वंगु खः ।
समितिइ निगूलिं देय्या विशषज्ञ डाक्टरत व विज्ञतय् दुजः कथं च्वनादीगु दु । उगु समितिं ज्ञान व अनुभव आदन–प्रदान यासे समस्या समाधानया लागि पहल यायेगु उदेश्यं नेपाल–इजरायल केरोना योजना (एनआइसीआई) गठन याःगु दु ।
कोराना महामारीपाखे उत्पन्न प्रभाव कम यायेत व आवश्यक मेडिकल व्यवस्थापनया लागि एनआइसीआई गठन इजरायलया लागि नेपाली राजदूत डा.अन्जान शाक्यं जानकारी बियादिगुु दु । वःगु जेठ १३ गते इजरायलया नेपाली राजदूतावासया संयोजनय् नेपाल व ईजरायलया चिकित्सकपि दथुइ नेपालय् अप्वोया वःगु कोरोना संक्रमण नियन्त्रण व न्युनिकरणया लागि इजरायलं याःगु अनुभव व सफलताया विषय आदन–प्रदानया लागि भर्चुअल सम्वाद जूगु खः ।
नेपालय् कोरोनाया वासः नापं आइसोलेसन व्यवस्थापनय् ग्वाहालि याइगु व निगू देय् दथुइया अनुभव कालबिल याइगु खँ धाःगु दु ।
इजरायलया लागि नेपाली राजदूत शाक्यया कथं उगु समितिया नेपालया पाखे स्वास्थ्य सेवा विभाग महानिर्देशक दिपेन्द्र रमण सिंह, नेपाल मेडिकल काउन्सिलया अध्यक्ष डा. भगवान कोइराला, स्वास्थ्य सेवा विभागया निर्देशक तारानाथ पोखरेल, नर्सिङ तथा सामाजिक सुरक्षा महाशाखा, स्वास्थ्य सेवा विभागया निर्देशक रोशनी लक्ष्मी तुइतुइ, राष्ट्रिय जनस्वास्थ्य प्रयोगशालाया निर्देशक डा.रुना झा, स्वास्थ्य तथा जनसंख्या मन्त्रालयका वरिष्ठ स्वास्थ्य प्रशासक डा.गुणनिधि शर्मा, शुक्रराज ट्रपिकल तथा सरुवा रोग अस्पतालया डा. अनुप बास्तोला च्वनादिगु दु ।
अथेहे, स्वास्थ्य तथा जनसंख्या मन्त्रालयया वरिष्ठ जनस्वास्थ्य प्रशासक, भीम प्रसाद सापकोटा, नेपाल सशस्त्र प्रहरी अस्पताल डा. शैलेन्द्र श्रेष्ठ, नेपाल आर्मी अस्पतालया डा. अरुण न्यौपाने, नेपाल आर्र्मी अस्पतालया डा.सुशील रावल, नेपाल प्रहरी अस्पतालया डा.आशिष दत्त, पाटन अस्पतालया डा.आशिष श्रेष्ठ, त्रिवि शिक्षण अस्पताल महाराजगञ्जया डा.सन्त कुमार दास च्वनादिगु खःसा नेपाल पक्षया संयोजकय् काठमाडौं विश्वविद्यालयया डा.विराज कर्माचार्य च्वनादिगु खः ।
