२०८० चैत्र १६, शुक्रबार

‘नेपालय् सच्चा लोकतान्त्रिक पार्टि संघीय समाजवादि जक खः’

लहनान्युज | थिंलाथ्व एकादशी ११३८ (नोभेम्बर २९ २०१७)

संघीय समाजवादि फोरम नेपालया सह अध्यक्ष राजेन्द्र श्रेष्ठं वर्तमान राजनैतीक घटनाक्रमं नेपाःया सच्चा लोकतान्त्रिक पार्टि संघीय समाजवादि फोरम नेपाल जक खःगु प्रमाणित जूगु धयादीगु दु ।

संघीय समाजवादि फोरम नेपाल येँ क्षेत्र नम्बर ७ चुनाव प्रचार समितिं येँय् याःगु पत्रकार सम्मेलनय् सह अध्यक्ष श्रेष्ठं प्रदेश सभा व प्रतिनिधि सभाया निर्वाचनया झ्वलय् तःधंगु दलपिन्सं गठबन्धन व तालमेलया नामय् याःगु ज्याखं थुगु शक्तित लोकतन्त्र, धर्म निरपेक्षता, गणतन्त्र विरोधी धकाः प्रमाणित याःगु धयादिल ।

सत्ताय् वनेगु लालसाय् राजतन्त्र हिन्दू राष्ट्र अले एकात्मक शासन व्यवस्थाया पक्षधरलिसे तालमेल याःवनाच्वंगु पार्टि गुकथं लोकतान्त्रिक जुइफइ धइगु सह अध्यक्ष श्रेष्ठया न्ह्यसः खः । न त लोकतान्त्रिक गठबन्धन धायेकाच्वंपिन्सं लोकतान्त्रिक चरित्र क्यनेफत न त वाम गठबन्धनं बाम चरित्र क्यनेफत धयागु श्रेष्ठया धापू खः । संघीयता, गणतन्त्र, धर्म निरपेक्षताया वकालत याइगु पार्टि संघीय समाजवादि जक खःगु नं श्रेष्ठं दावी यानादिल ।

संघीय समाजवादि जक हे आःया धात्थेंया लोकतान्त्रिक शक्ति खःगु श्रेष्ठं दावी यानादिल । संघीयताय् आधारीत समाजवादया न्हूगु सिद्धान्तलिसें छगू न्हूगु शक्तिया रुपय् ससफो नेपाल न्ह्यःने वःगु वय्कलं धयादिल । थःपिं समतामूलक समृद्धिया मुद्दालिसें चुनावी ख्यलय् कुहांवयागु वय्कलं धयादिल ।

थःपिनिगु समृद्धिया मुद्दा धयागु सम्पन्न, पूँजीपति वर्गया नितिं जक मखसें उत्पीडित, ल्यूने लाःगु वर्गया नितिं तकं खःगु वय्कलं स्पष्ट यानादिल । नेपाःयात न्यादँया दुने उर्जाय् आत्मनिर्भर दयेकेगु, कुल गार्हस्थ उत्पादन निदुगलं मयाक्क थकायेगु, प्रतिव्यक्ति आय निदुगं थ्यंकेगु अले २५दँ दुने थनया स्थानीय श्रोत जल, जमिन, जडिबुटि व जनशक्तिया सदुपयोग यानाः देय्यात विकसित मूलुकया तगिमय् थ्यंकेगु थःपिनिगु योजना नं श्रेष्ठं घोषणा यानादिल ।

उगु हे ज्याझ्वलय् न्वःवासें येँ क्षेत्र नम्बर ७ (१) प्रदेश सभापाखे ससफो नेपालया प्रत्यक्ष उम्मेदवार श्यामकृष्ण प्रजापतिं विकासया नामय् जूगु गैरन्यायिक सडक विस्तारं पिडित स्थानीय वासिन्दाया पुनस्र्थापना लिसें थनया भाषिक, सांस्कृतिक सम्पदाया संरक्षणय् थःपिं क्रियाशिल जुइगु धयादिल ।

पहुँच दुपिन्त ततःधंगु अपराध यानाः नं कानून मथीगु, जनतां कर पुलेगु नितिं तकं घुस नकेमाःगु कथंया भ्रष्टाचारं लिप्त जुयाच्वंगु थनया प्रशासनया भ्रष्टाचार मुक्त, सुशासन युक्त प्रशासनया रुपय्  हिलावनेगु थःपिनिगु योजना दुगु नं प्रजापतिं जानकारी बियादिल ।

ससफो नेपालपाखें प्रदेश सभाया समानुपातिक उम्मेदवार शेषनारायण महर्जन, प्रतिनिधि सभापाखे क्षेत्र नम्बर ७ (१)य् प्रत्यक्ष उम्मेदवार ज्ञानेन्द्र  मोहन श्रेष्ठ, ससफो नेपालया केन्द्रिय सल्लाहाकार डा. महेशमान श्रेष्ठं नेपाःया सांस्कृतिक, ऐतिहासिक, समाुदायिक पहिचान स्थापित यायेत संघीय समाजवादि फोरम नेपाल क्रियाशिल जुयां तुं च्वनीगु धयादिल ।

Categorized in राष्ट्रिय