‘नेपाल संवत्यात व्यवहारिक रुपं छ्यलेमाः’
राष्ट्रिय मान्यता ब्यूकथं नेपाल संवत्या व्यावहारिक छ्यलाबुला व मौलिकता स्थापना यायेत राज्य, सञ्चार व बजारया महत्वपूर्ण भूमिका दुगु थौं यलय् जूगु छगू ज्याझ्वःया ब्वतिमिपिन्सं धाःगु दु ।
 
बौद्ध युवा कमिटी यलं थौं इखाछेँस्थित ऐतिहासिक नापिचन्द्र महाविहारय् ग्वसाः ग्वःगु नेपाल संवत्या व्यावहारिक कार्यान्वयन विषयक अन्तर्क्रिया ज्याझ्वःया ब्वतिमिपिन्सं नेपाल संवत्या सैद्धान्तिक महत्वयात लिनाः राज्यं थुकियात व्यापकता बियाः छ्यलाबुलाय् हःसा जनस्तरय् थुकिया व्यापक प्रभाव लाइगु धाल । लिसें वक्तातयसं सञ्चारमाध्यम व बजारया भूमिकां तँसा विस्तार व थुकिया महत्वबारे थुइकीगु बिचाः नं तल ।
 
उगु अन्तर्क्रिया ज्याझ्वःया उलेज्या यासें नेवाः पत्रकार राष्ट्रिय दबूया केन्द्रीय नायः श्रीकृष्ण महर्जनं नेपाल संवतयात राष्ट्रिय मान्यता बीकेत नेवाः समुदायया निर्णायक भूमिका दुगु खःसां थुगु सम्वत् नेवाःतयगु जक मखूगु स्पष्ट यानादिल । महर्जनं नेवाः समुदायया भाषिक, जातीय व सांस्कृतिक मुद्दा व नेपाल संवत्या मुद्दा बिस्कं बिस्कं खःगु बिचाः तयादिल ।
 
नेपाल संवत् ११३७ न्हूँद समारोह समिति यलया नायः अले उद्योगी मोतिलाल शिल्पकारं नेपाल संवत्या सैद्धान्तिक व व्यावहारिक महत्वबारे मेमेगु भाषाभाषी व जातजातियात नं थुइकेमाःगु धयादिल ।
 
 
ज्याझ्वलय् नेपाल संवत्या व्यावहारिक कार्यान्वयनबारे ज्यापौ न्ह्यब्वसें सञ्चारकःमि सुरजवीर बज्राचार्यं राष्ट्रिय संवत्या मान्यता ब्यूसां राज्यं थुकियात व्यवहारय् छ्यलेत कञ्जुस्याई याःगु धासें राज्यं थुकिया बारे स्पष्ट दृष्टिकोण न्ह्यःने हयेमाःगु धयादिल । नेवाः पत्रकार राष्ट्रिय दबूया केन्द्रीय न्वकू तकं खःम्ह बज्राचार्यं सांस्कृतिक नखःचखः, बुदिं, जात्रा आदिइ व्यवहारिक रुपं छ्यलाच्वंगु संवत्यात न्हियान्हिथंया जीवनय् छ्यलेत आम जनस्तरय् थुकिया चेतना थकायेगु लिसें राज्यया निर्णायक भूमिका दइगु नं धयादिल ।
 
ज्यापतिइ टिप्पणी यासें बौद्ध युवा कमिटीया निर्वतमान नायः सुनील महर्जनं नेपाल संवत् राष्ट्रियता, आम नेपाःमिया आत्मसम्मानलिसे स्वानाच्वंगु दुगु धासें थुकिया व्यावहारिक छ्यलाबुलाया नितिं राज्य, बजार व सञ्चारया थःथःगु थासय् महत्वपूर्ण भूमिका दुगु बिचाः तयादिल । नेवाः पत्रकार राष्ट्रिय दबूया केन्द्रीय मू छ्यान्जे तकं खःम्ह महर्जनं थौंया इलय् आम मनूतयसं थुकिया महत्वयात आत्मसात याकाः व्यवहारिक छ्यलाबुलाया दिशाय् न्ह्याका यंकेमाःगु धयादिल । 
 
बौद्ध युवा कमिटीया नायः अनिल महर्जनं ल्यायम्ह वर्गया सशक्तिकरण व स्थानीय निकायस पहुँच, समुदायलय् शान्ति व सकारात्मक चिन्तन दयेकेत वंगु १९दँ न्ह्यःनिसें ज्या यानाच्वंगु थुगु संस्थां नेपाःमिपिनिगु मौलिकतालिसे स्वानाच्वंगु नेपाल संवत्या महत्व आम जनता दथुइ स्थापित याकेगु आज्जुं ज्याझ्वःया ग्वसाः ग्वयागु धयादिल ।
 
ज्याझ्वः धुंकाः यल उद्योग वाणिज्य संघ, ताम्रकार समाज, ज्यापू समाज, यलया थीथी विहार व महाविहार, राष्ट्रिय युवा महासंघ यल जिल्ला समिति, महानगरीय प्रहरी प्रभाग मंगलबजार, नेपाल परम्परागत बौद्ध धर्म संघ, युवक बौद्ध मण्डल, कलाका तीन पाईला लिसें सामाजिक, धार्मिक, सांस्कृतिक लिसें थीथी ख्यलय् क्रियाशील संघसस्थाया प्रतिनिधितय् दथुइ चियापान व न्हूदँ व स्वन्ति नखःया भिंतुना कालबिल जूगु खः ।