‘पुरा स्वनिगः छगू यूनिटया रुपं न्ह्याःवनेमाः’
बिराजकाजी राजोपाध्याय | चौलागा एकादशी ११४०
येँ महानगरपालिकाया मेयर विद्यासुन्दर शाक्यं हलिंन्यंक महामारीया रुपं न्यनाच्वंगु कोरोना भाइरस कोभिड १९ या रोकथाम व नियन्त्रणया लागिं मुक्कं स्वनिगः हे छगू यूनिटया रुपं न्ह्याःवनेमाःगु धयादीगु दु ।
उपत्यका मेयर फोरमया कजि तकं खःम्ह कामपा मेयर विद्यासुन्दर शाक्यं आःया परिस्थितीइ थवंथवय् ग्वाहालि व सहकार्य यासें न्ह्याःवनेमाःगु जूगुलिं छगू स्थानीय तह वा जिल्ला धकाः च्वने मफइगु धयादिल ।
महामारीया रुपं न्यनाच्वंगु कोभिड १९या संक्रमण छथाय् छम्हेसित जुयाकथं उकिं मुक्कं समाजयात हे संक्रमित याये फुगु जूवुलिं दक्वं छधी जुयाः रोकथाम व नियन्त्रणय् जायेगुया विकल्प मदुगु शाक्यया धापू खः ।
‘छगू जिल्ला वा स्थानीय तह धकाः च्वंसा टेकु अस्पताल येँय् दु, थन मेपिन्त वासः यायेमखु धाये पायछि जुइ ला ?’ मेयर शाक्यं धयादिल ‘अथे हे, येँया मनूयात ख्वप वा यलय् क्वारेन्टाइन वा आइसोलेसनय् तयेमालीगु स्थिती नि मवइ धाये फइमखु ।’
थ्व हे परिकल्पनायात लिनाः उपत्यका मेयर फोरमं योजना न्ह्यःने यंकागु वयकलं जानकारी बियादिल ।
आःया परिस्थितीइ स्थानीय तह, जिल्ला आदिया नामं बायाः मखु, छधी जुयाः न्ह्याःवनेमाःगु धासें शाक्यं थवंथवय् साथ व ग्वाहालि बियाः सहकार्य यासें येँ लिसें स्वनिगः व मुक्कं राष्ट्रयात हे संक्रमणमुक्त दयेकेगु अभियानय् थःपिं जानागु धयादिल ।
प्रशासनिकय ज्याया लागिं दयेकूगु क्षेत्र धकाः आःया परिस्थितीइ लिकुने मफइगु शाक्यं धयादिल ।
कागेश्वरी मनहरा नगरपालिकास्थित सनसिटि अपार्टमेन्टय् निम्ह संक्रमित खनेदुगु लिसें स्वनिगःया दक्वं स्थानीय तहया सहकार्यया अपरिहार्यता झन पुष्टि जूगु शाक्यं दावी यानादिल ।
कागेश्वरी मनहरा नगरपालिका पेप्सीकोलास्थित सनसिटी अपार्टमेन्टय् लण्डनं लिहांवःपिं निम्हेसिके कोरोना भाइरस कोभिड १९या संक्रमण पुष्टि जुइधुंकूगु दु ।
शाक्यं धयादिल, ‘आः कागेश्वरी मनहरा नगरपालिकालिसे मध्यपुर थिमि नगरपालिका स्वाना हे च्वंगु दु । ख्वप नगरपालिका लिक्क हे दु । निपलाः न्ह्यःने येँ महानगरपालिका अले यल महानगरपालिका व यल जिल्लाया नगरपालिकात दु ।’
संक्रमणया रोकथाम व नियन्त्रणया लागिं परिक्षणया दायरा थकायेमाःगु व थःपिं थुकिया हे तयारीइ जानाच्वनागु शाक्यं धयादिल ।
सरकारं माःगु ज्वलं याकनं उपलब्ध याकाब्यूसा परिक्षणयात तच्वयेकाः संक्रमितया पहिचान यासें सुरक्षित लकस दयेकावनेगु योजना शाक्यं कनादिल ।
थुकिया नापं, अन्तर्राष्ट्रिय उडान बन्द जुइधुंकूगु अवस्थाय् विमानपाखें संक्रमण दुहांवइगु सम्भावना आः मदुगु तर भारतीय सीमानाकां धाःसा जोखिम दुगु शाक्यं धयादिल ।
भारतीय सीमानाकां सुलाः सुलां नेपाल दुहांवयेगु ज्या मद्यूबलय् नेपालय् संक्रमणया जोखिम अप्वःगु वयकःया धापू दु ।
लकडाउन ताःहाकयावंगु लिसें नसा ज्वलंया अभाव जुइके मबीत सुनां नं स्वनिगः पिनं तरकारी, फलफुल लिसेंया नसा ज्वलं हयेगु धाःसा कामपां समन्वय यानाबीगु नं वयकलं धयादिल ।
सरकारं लकडाउनया छुं भचा छ्वासुकाः थीथी घरेलु उद्योगं न्ह्याके बी धुंकूगु अवस्थाय् अवस्था स्वयाः किसानयात बुइँ ज्या याकेबी नं ज्यूगु तर सर्वसाधारण थः हे सचेत जुयाः न्ह्याःवनेमाःगुलिइ मेयर शाक्यं बः बियादिल ।
Categorized in राष्ट्रिय
