‘मरुसतः पुनर्निर्माण ठेक्काय् बीमज्यू’
लहनान्यूज सम्वाददाता | कछलागा अष्टमि ११३७ (नोभम्बर २२ २०१६)
मरुसतःया पुनर्निर्माणया ज्या ठेक्काय् बीमज्यूगु स्थानीय विज्ञ व सरोकारवालातयसं धाःगु दु ।
काष्ठमण्डप पुनर्निर्माणको लागि अभियान व सम्पदा तथा वातावरण प्रेमी पुचलं थौं येँय् याःगु काष्ठमण्डप लिसें थीथी सम्पदा ठेकेदारी प्रथाय् पुनर्निर्माणया औचित्य विषयक अन्तक्र्रिया ज्याझ्वःया वक्तापिन्सं काष्ठमण्डपया पुनर्निर्माण ठेकेदारी प्रथां यात धाःसा थुकिया अस्तित्व संकटय् लाइगु धाःगु खः । वक्तापिन्सं काष्ठमण्डपया पुनर्निर्माणय् स्थानीय मनूतयगु हे सहभागिता दयेमाःगुलिइ बः ब्यूगु खः ।
ज्याझ्वलय् नेकपा एमालेंपाखेंया सांसद रामबीर मानन्धरं धरहराया पुनर्निर्माणया खँ ल्हाइपिन्सं काष्ठमण्डपया पुनर्निर्माणय् छाय् सः मतःगु धकाः न्ह्यसः तयादिल । काष्ठमण्डप थुज्वःगु सांस्कृतिक व ऐतिहासिक सम्पदाया पुनर्निर्माण ठेक्कापट्टाय् याकाः स्थानीय आदिवासी जनजातिया संस्कृति हे न्हंकेत स्वःगु वयकःया धापू खः ।
लुम्बिनि विश्वविद्यालयया उपकुलपित प्रा.डा.नरेशमान बज्राचार्यं ठेकेदारी प्रथाय् अपनत्व मदइगु जूगुलिं हे काष्ठमण्डपया निर्माण नायः प्रथा कथं जुइमाःगु धयादिल । प्रा.डा.बज्राचार्य काष्ठमण्डपया चा, धलिं आदि कथंया भग्नावशेष चीकेत, ल्ह्ययेत जक मखु, पुनर्निर्माणय् नं स्थानीय समुदायया सहभागिता दयेमाःगु खँय् बः बियादिल ।
ज्याझ्वलय् नेपाल हस्तकला महासंघया नायः धर्मराज शाक्य, नेपाली कांग्रेसपाखेंया सांसद भीमसेनदास प्रधान, वास्तुविद सुदर्शनराज तिवारी, अनुसन्धाता प्रा. दिनेशराज पन्त, डा.साफल्य अमात्यलिसें नं सम्पदाया पुनर्निर्माणय् ऐतिहासिक महत्वयात ल्वःमंके मज्यूगु लिसें स्थानीय समुदायया ब्वति दयेमाःगु खँय् बः ब्यूगु खः ।
Categorized in राष्ट्रिय
