–राजु शाक्य
    यःमरी पुन्ही यःमरी जित यः । यःगु कारण चाहिँ यःमरीया गजबगु चाकु सवा खः । लालमोहन गुलि यः यःमरी नं उलि हे यः । यःल धायेवं तु उघ्रिमय् दइगु चीज मखु थ्व । दयेके अपु नं मजु । माँं नंं यःमरी छुउगु जित बालांक हे लुमं । जाकि चुँयात न्हाल । न्हायातःगु छुुँचुयात ख्वाउमजुइमाः धकाः यःचुस्से च्वंगु दोलाइया खोलं भुनातल । छत्वाःचा छुचुँ धेनाकयालि चोला पत्तिचां गां वकल, ग्वपं थे च्वंक चा  चाहिका । अले उकि हाम्वः दुगु चाकु प्वकल । च्

 

वय्या प्वाः निच्वः पिकया तिनाव्छल । लः क्वाकातगुलि हाःल । बस् । यायेगु थुलि हे खः । तर धाये थे छुइगु ज्याः चाहिँ उलि अपू मजू । छुँचु ख्वाउल कि ख्येँ बाँलुइकेबलये पत्पत् तज्याये यः । उकि छुचुँयात त्वपुयातयेमाःगु खः । यःमरीया पिनेया ब्व प्याला प्याला थित कि यःमरी बुत धकाः सिकेगु, मामं थथे हे धाःगु लुमं । छुँ छुँ ल्वहँचा मरी व प्यारा मरी नं दयेकेगु । ल्यंदुगु यःमरी कन्हय् कुन्हु सुथय् मि छुना नयेगु । आः लुमं ंलुमं न्ह्यइपुसे च्वं ।
 

थौकन्हे यःमरी थुलि दुर्लभ मखुत । छित यःमरी नयेगु इच्छा जुल अले धेबा पुलेत नं तयार खःसा अर्डर बिया दिसँ, छुँ भचा ई पिया दिसँ । यःमरी न्ह्यःने थ्यंकवइ । थ्वयात व्यापारया खँ धयादिसँ वा उपभोक्तावादया फाइदा धयादिसँ । कुतिकुति सनाच्वने म्हाः तर नयेगु इच्छा जुलसा धन्दा कया दी म्वाः अपुक छित त्यःजु याःवई यःमरीं । चाकु नये मज्युसा ला सा छि द्यात !
 

ई ला यक्वः हे हिले धुँकल । यःमरीया लोकप्रियता नं यक्वः हे थहाँ वने धुँकल खनि । ई व्यः मदयेक ब्वाय् ब्वाय् जुइमाम्ह कलम ज्वनिम्ह जिं थे जाम्ह सञ्चारकःमिं थ्वया ख्यातियात तिफ्याये मफूगु जित वाः चाल । छन्हु सुथय् सवा आठ बजेति मन्त्रीया छेँ थ्यंक वने माल । मेपिं न मनूत पिउवया च्वंने धुँकल । बाघौति लिपा मन्त्री क्वहाँ वल । सचिवं जिमित ल्यु ल्यु कोठाय् द्वाहाँ वनेत संकेत यात ।

 

जिमि टोली नेता स्यल्लाम्ह हे  खः तर छथ्व मिसा न्ह्यलुवा त मन्त्रीया नाप खँ ल्हाःल्हाः कोठाय् द्वाहाँ वन । जिमिगु पाः मिचे जुल धकाः टोली नेतां ख्वाः पाउकल । जिपि छन्हु न्ह्यः हे ई कयापिं । घौ पखल लिपा मन्त्रीं जिमि टोली नेताया नां हे कया सताः हल । अले द्वाहाँ वना । मिसा न्ह्यलुवा त ला यःमरी मिइगु छगू ‘आउटलेट’ चायेकेगु प्रस्ताव धकाः ज्वना वंगु जुयाच्वन ।

 

‘जिमित स्वया बिलमाल’ धकाः पत्तिकं पत्तिकं उमिसं धयाच्वंगुलि जिमिसँ खँ थुल । यःमरी आ चाहिँ नखः बलय् जक पिलुवइगु नसा मखये धुँकल । थ्वया ख्याति राष्ट्रिय जक मखु अन्तर्राष्ट्रिय ख्यः थ्यंक नं बढे जुइ धुँकल । थुकिया उपभोक्ता व बजाः खःपिं मिसा न्ह्यलुवातयेत छिं छु धयादी ? जिं ला तारीफ हे याना । निदँ बुन्हि, प्यदँ बुन्हि हनिबलय् आः छित दुःख जुइमखुत । छिँ याउँक हे थःथितिपिन्थाय् यःमरी थ्यंके फइगु जुल । थथे जुइ नं धुँकल । थ्व समयया ह्युपाः खः ।
 

 

यःमरी पुन्ही कुन्हु ज्यापू दिवस हनि । धिमे थाना, बाँसुरी पुया त्वा त्वालं जुलुश न्ह्याई । बडो उत्साह दु जुलुशय् ब्वतिकापिनि । धुँन्या चाहिका वइपिं, प्याखँ ल्हुया वइपिं । ज्यापू समुदायया बिस्कं म्हसिका छिं थन खँका दि फई । आ देशं हे ज्यापू दिवस हनि ।

छक्वः यःमरी धात्थें गपाय्ग्वः धकाः लय् पिया हे स्वया । अहो ! भरायग्वगु यःमरी गाडी विराजमान काः, त्यानुचाम्ह मनू आराम यानाच्वंम्ह थें । मिजं यःमरी व मिसा यःमरी निथी दु धाई । नितां दयेका ब्वये हःसा झन् हे बाँलाई । जिगु सुझाव दु ज्यापू दिवस कुन्हु यःमरी दयेकेगु धेंधें बला नं याना दिसँ । विदेशय् थुलिथुलि किलोया केक धकाः दयेकेगु याः थें थन छाय् मयायेगु ? 

 

यःमरी पुन्ही कुन्हु छेँ छेँ वना यःमरी फ्वंवनी । मचाबलय् पासापिं नाप छेँ छेँ वना त्यःछिंत्यः फ्वंवनागु लुमं । झी नेवातय् मंकाः छेँ धस्वाकेगु हुनिं भाषिक कार्यकर्तात जाना त्यःछिंत्यः फ्वंवनेगु यानाच्वंगु दु । मंकाः छेँ धस्वाइ तिनि – थ्व जिगु विश्वास खः । यःमरी ज्यापू समुदायया जक मखु समग्र नेवाः जातिया हे म्हसिका खः । त्यःछिंत्य नेवाः मात्र या हे संस्कृति खः । थःगु म्हसिका ल्यंका तयेगु र संस्कृतिया सम्बद्र्धन यायेगु धिसिलागु छपला मंकाः छेँ दनेगु खः । ज्यापू दिवसया नारा आ ‘मंकाः छेँ धस्वाकेनु’ धयागु जक जुइमाः ला ? जित ला थथे हे ताः ।