‘येँ महानगरयात दसु कथंया शहर दयेके’
लहनान्यूज | बछलाथ्व एकादशि ११३७ (मे ६ २०१७)
संघीय समाजवादि फोरम नेपाल व नयाँ शक्ति पार्टि फोरम नेपालया येँ महानगरया नितिं मंकाः घोषणा पौ सार्वजनिक जूगु दु ।
थौं येँय् छगू पत्रकार सम्मेलन यासें निगुलिं पार्टिया मंकाः घोषणा पौ सार्वजनिक याःगु खः ।
निगुलिं पार्टिपाखें मेयरया मंकाः उम्मेदवार पवित्र बज्राचार्य व उपमेयरया मंकाः उम्मेदवार अर्यालया लिसें ससफो नेपालया ल्यू नायः राजेन्द्र श्रेष्ठ, नयाँ शक्तिया नेताद्वय परशुराम तामाङ हिसिला यमिं मंकाः रुपं घोषणा पौ सार्वजनिक यानादीगु खः ।
थुगुसीया स्थानीय तहया चुनावय् छपा ल्हातं मसाल ज्वनातःगु चुनाव चिं लिसें संघीय समाजवादि फोरम नेपाल व नयाँ शक्ति पार्टि नेपालया मंकाः प्यानल चुनावी ख्यलय् दु ।
निगुलिं पार्टिपाखें येँ महानगरय् मंकाः उम्मेदवार कथं मेयरया नितिं संघीय समाजवादिया पवित्र बज्राचार्य व उपमेयरय् नयाँ शक्तिया सविना अर्याल चुनावी ख्यलय् दु ।
‘सुस्वास्थ्य व स्वच्छ वातावरण हे जिगु प्राथमिकता’
घोषणा पौ सार्वजनिक ज्याझ्वलय् नवासें मेयरया उम्मेदवार पवित्र बज्राचार्यं येँयात च्वनेबहःगु, हलिंया हे नितिं दसु कथंया शहर दयेकेगु हे थःगु आज्जु खःगु धयादिल ।
थः मेयर जुइधुंकाः फोहर, धःया पायछि व्यवस्थापन, सडक, सडक मत, पार्किङया व्यवस्थापनया लिसें महानगरय् शिक्षाया गुणस्तर थकायेगु व काठमाडौंवासीया सुस्वास्थ्य हे थःगु न्हापांगु प्राथमिकता जुइगु बज्राचार्यया धापू खः ।
प्रत्येक वडाय् स्वास्थ्य चौकी चायेकेगु नं थःगु योजना दुगु वयकलं धयादिल ।
वडाध्यक्ष, सभासद् लिसें येँ महानगरपालिकाया कार्यवाहक मेयर कथं थम्हं यक्व हे उपलब्धीमूलक ज्यात न्ह्याकागु लुमंकुसें थःके ई कथं ल्वयक न्हूगु योजनात दुगु बज्राचार्यं धयादिल ।
थम्हं देशय् लिसें विदेशय् मुंकागु अनुभवयात आः येँया विकासया लागिं छ्यलेगु योजना दुगु नं बज्राचार्यया धापू खः ।
उपमेयरया मंकाः उम्मेदवार नयाँ शक्ति पार्टिया सविना अर्यालं विकासया लागिं येँ थः हे सक्षम दुगु व थन व्यवस्थापन जक मगाःगु धयादिल ।
अर्यालं येँय् उपलब्ध श्रोत व साधनयात हे छ्यलाः पायछि व्यवस्थापन यायेगु व येँयात सकसिनं खंकूगु म्हगस कथंया शहरया रुप बीगु धयादिल ।
ज्याझ्वलय् संघीय समाजवादी फोरम नेपालया ल्यू नायः राजेन्द्र श्रेष्ठं वर्तमान परिप्रेक्षउ् राजनैतीक क्षेत्रय् अस्वस्थ अभ्यास न्ह्याःगु धासें देय् व नगरया विकासया लागिं सकलें निस्वार्थ भावनां न्ह्याःवनेमाःगु धयादिल । नयाँ शक्ति पार्टि नेपालया नेता पर्शुराम तामाङं दलीय धेंधें बल्लाःया दथुइ विकास ल्यूने लाःगु धासें थःगु पार्टि न्ह्याब्लें विकासया लागिं जानाच्वनेगु धयादिल ।
Categorized in राजनीति
