‘लकडाउनय् उखेथुखे मजुइगु हे बांलाःगु लँपु जुइ’ – शाक्य
बिराजकाजी राजोपाध्याय | बछलाथ्व षष्ठी ११४०
येँ महानगरपालिकाया मेयर विद्यासुन्दर शाक्यं सु गन दु अन हे सुरक्षित च्वनाः लकडाउनया पूर्ण पालना हे संक्रमण रोकथाम व नियन्त्रणया लागिं बांलाइगु धयादीगु दु ।
आः लकडाउनया अवस्थाय् येँय् नं सुं नं पिहांमवनेगु इनाप लिसा कासें नयेत समस्या जूसा सम्बन्धित वडाध्यक्षयात खबर यायेत कामपा मेयर शाक्यं इनाप यानादिल ।
संचारकःमितलिसे खँल्हाबल्हाया झ्वलय् शाक्यं नयेत समस्या जूसा नेपाली जक मखु, विदेशीतयत नं येँ महानगरपालिकां हे नकेगु व्यवस्था याये धासें आः येँय् नं सुं पिहां वनेगु वा येँय् वयेगु ज्यां संक्रमण अप्वः न्यनावनाः झन समस्या जुइगु धयादिल ।
म्हिगःया दिनय् सुयात नं येँय् नं सुं नं पिहांवनेम्वाः धयाबलय् थःत ब्वः ब्यूपिन्सं हे थौं येँय् दुहांवःपिन्त ब्वः बियाच्वंगु धासें थज्याःगु प्रवृत्तीं तःधंगु समस्या वयेफुगु आशंका शाक्य प्वंकादिल ।
‘आः छुं मनूतयत पितछ्वल धाःसा कन्हय् लखौं मनूत थन वयेफु’ शाक्यं धयादिल ‘समस्या अन हे न्ह्याइ, सुयात क्वारेन्टाइनय् तयेगु, सुइगु व्यवस्थापन गुकथं यायेगु ? थुकिया समाधान माले हे थाकुइ ।’
आः लकडाउनय् जिल्लाय् वंपिं लिसें कन्हय् विदेशं हे नेपाल लिहांवइपिनिगु व्यवस्थापन गुकथं यायेगु धइगु तःधंगु हाथ्या आः दुगु शाक्यया धापू खः ।
सम्भावित हाथ्या व थुकिया समाधानया विषयस विज्ञतलिसे सहलह यायेमाःगुलिइ बः ब्युसें थुकी स्थानीय जक मखु, प्रदेशया लिसें संघीय सरकारं हे योजना दयेका वनेमाःगुलिइ मेयर शाक्यं बः बियादिल ।
थज्याःगु समस्याया दीगो समाधानय् वनेत संघीयतायात पूर्ण कार्यान्वयनय् यंकाः मोफसलय् नं स्तरीय स्वास्थ्य सेवा, शिक्षाया विकास यायेगुया विकल्प मदुगु शाक्यया धापू खः ।
राजधानी केन्द्रित विकासं थन अनियन्त्रित शहरिकरण अप्वइगु व थुकिं राजधानीयात समस्याय् झन समस्या तनेहइगु वयकःया बिचाः खः ।
समस्यालिसें अवसर नं मालावने फइगु शाक्यया धापू खः ।
Categorized in राष्ट्रिय
