‘लिबाय् धुंकाः’ जेष्ठ ३० गतेनिसे क्यनेज्या
नृपेन्द्रलाल श्रेष्ठ | बछलागा चौथी ११३९ (मे २२ २०१९)
अडियो भिडियो स्टेशन प्रा.लि. या ब्यानरय् पिहा वयेत्यःगु नेपालभाषाया न्हुगु संकिपा ‘लिबाय् धुंकाः’ थ्व हे वइगु ज्येष्ठ ३० गते रिलिज जुइ त्यःगु दु ।
थुगु संकिपा ‘लिबाय् धुंकाः’ थ्व हे वइगु ने.सं. ११३९ तछलाथ्व एकादसि (जेष्ठ ३० गते) बिहिवाः ग्वार्कोया गुण सिनेमाय् क्यनेज्या जुइगु धकाः कलाकार आराध्यालक्ष्मी खड्गी लहनान्युजयात कनादिगु खः ।
थुगु संकिपा राजेशमान सिंह नं निर्देशन यानादीगु खःसा थुगु सकिपालय् कलाकारपिं आशाकाजी थकु, आरएल महर्जन, नारायणदेवी प्रधान, आराध्यालक्ष्मी खड्गी, मन्जु श्रेष्ठ, भीसमेन रिजाल, कुमार कार्की, उत्तम खत्री, सुरज श्रेष्ठ (बकंफुस्लु), राजाराम भामपिन्स म्हितादिगु दु ।
थुगु सकिपालय् ‘लिबाय् धुंकाः’ दुने निर्देशक राजेशमान सिंहं संकिपाया निर्देशन लिसेलिसें संकिपाया बाखं, स्क्रीनप्ले, संवाद व म्ये नं थःम्हेस्यां हे च्वयादीगु दुसा कीर्ति श्यामसुन्दर जोशी व पियुष कायस्थलिसे जानाः राजेशमानं संकिपाया सम्पादन तकं यानादीगु दु ।
थुगु सकिपा सामाजिक खःसा लबस्टोरीे नापनाप कमेडी एक्सन, सस्पेन्स न स्वये दइसा सकिपालय् निपु म्ये दुथ्याका तःगु दु ।
संकिपा ‘लिबाय् धुंकाः’ दुने निपु म्ये दुथ्याकातःगु दु । नांजाःम्ह संगीतकःमि विरेन शाक्य व सुमन कपालीया संगीत दुथ्याःगु म्येय् स्वयं सुमन कपाली थःम्हेस्यां व लिसें नांजाःम्ह म्येहालामि सानुबाबु महर्जन व रत्नशोभा महर्जनं हालादीगु दु ।
अथेहे, संकिपाया कोरियोग्राफी संकिपाया नकिं आराध्यलक्ष्मी खड्गीं संकिपा ख्यलय् दकले न्हापांगुखुसि यानादीगु खः ।
