‘विकास व निर्माण केन्द्रविन्दुइ तया न्ह्यज्यायेगु जुइ ’— खनाल
लहनान्यूज | ११३८ पोहेंलाथ्व पंचमि (डिसेम्वर २४, २०१७) येँ
पूर्व प्रधानमन्त्री नेकपा एमालेया वरिष्ठ नेता झलनाथ खनालं आः थःपिं विकास व निर्माणयात केन्द्रविन्दु भाःपिया न्ह्याःवनाः वइगु १०दँ दुने देय्या ख्वाःपाः हिलेगु दावी यानादीगु दु । देशयात समृद्धिपाखे न्ह्याकायंकाः देय्या ख्वाःपाः हिलेगु क्षमता दुगु विश्वासय् देय्या जनतां वामगठबन्धयात देय्या जिम्मेवारी लःल्हाःगु धासें पूर्वप्रधानमन्त्री खनालं आः देशय् स्थीर सरकारलिसें विकास व समृद्धि ल्हातय् लाइगु धयादिल ।
येँया डल्लु आवास स्थानीय सहयोग समितिं ग्वसाः ग्वःगु बधाई लिसें सम्मान ज्याझ्वलय् न्ववानादिसें नेता खनालं धयादिल, ‘नेपालय् वामपन्थी सरकारं न्हापांगु खुसिइ अत्याधिक बहुमत प्राप्त याःगुलिं आः देसय् तारन्ताः सरकार हिलेगु परम्परा तोडे जुइ । सरकार परिवर्तन जक जुयाच्वनीगु अवस्थां देय्या जनतां फयेमालाच्वंगु दुःख कष्टपाखें झी मुक्त जुइगु जुल । आः देश सम्पन्नतापाखें न्ह्याःवनीगु ।’ देशया थीथी इलय् जूगु थीथी आन्दोलन लिपा आः देश निर्माणया ई वःगु पूर्वप्रधानमन्त्री खनालया धापू खः । ‘न्हापा झीगु देशय् युद्ध जुल, जनयुद्ध जुल, संघर्ष जुल, क्रान्तित जुल, आन्दोलनत जुल, आः उज्वःगु आन्दोलनया यूग सिधल, आः झी नवनिर्माणया युगपाखे न्ह्याःवनेधुनागु दु’ खनालया धापू खः ।
येँ क्षेत्र नं. ८(क) प्रदेश सभा सदस्य राजेश शाक्यं भुखाचं क्वदःगु सम्पदा पुनर्निर्माणय् बः बीगु योजना घोषणा यानादिल । ‘आः तक सरकारं भुखाय् पिडितपिन्त सहुलियत ब्याजदरय् २५ लख तका त्यासा बी धाःगु बिइमफया च्वंगु अवस्थाय् व याकनं बीकेत जिं पहल याये ।’ शाक्यं धयादिल । थः नेता मखसें जनताया ज्या याइम्ह थः हे मनू भाःपियाः थःत ज्या ब्वयेत शाक्यं सकसितं इनाप यानादिल ।
येँ क्षेत्र नं. ८ पाखें प्रतिनिधि सभाय् निर्वाचित जीवनराम श्रेष्ठं बाम गठबन्धनयात त्याकाबिउपिं सकसित सुभाय् देछासें मत बियाः थः प्रतिनिधि ल्यःपिं जनता आः थःगु कर्तब्य सिधल धकाः सुम्क च्वने मज्यूगु धयादिल । ‘याये धकाः बचं ब्यूगु ज्या यात कि मयाः धकाः न्ह्याबलें स्वयाच्वनेमाः । ज्या मयाःसे सुम्क च्वन धाःसा खबरदारी यायेमाः।’ श्रेष्ठं जनतायात इनाप यानादिल । नेपाल देशय् हे न्हापां ल्याण्ड पुलिङ यानाः दयेकातःगु नमुना आवास क्षेत्र डल्लु आवासयात साँस्कृतिक रुपं नं नमुना क्षेत्र कथं विकास याना यंकेमाःगु बिचाः श्रेष्ठं तयादिल ।
डल्लु आवास स्थानिय सहयोग समितिया नायः भाजु राजा शाक्यया सभापतित्वय् जूगु बधाइ अले सम्मान ज्याझ्वलय् थौंकन्हय् डल्लु आवासय् हे च्वना वयाच्वनादीम्ह इलाम क्षेत्र नं. १ पाखें प्रतिनिधि सभा सदस्यय् निर्वाचित पूर्व प्रधानमन्त्री एमालेया वरिष्ठ नेता झलनाथ खनालया लिसें येँ क्षेत्र नं ८य् निर्वाचित प्रतिनिधि सभाया दुजः जीवनराम श्रेष्ठ, येँ क्षेत्र नं ८ (क) प्रदेश सभाया दुजः राजेश शाक्य व वडां नं. १५या वडाध्यक्ष ईश्वरमान डंगोलयात नं सम्मान याःगु खः । येँ क्षेत्र नं ८ (ख)या प्रदेससभाय् निर्वाचित अष्टलक्ष्मी शाक्य धाःसा कार्य व्यस्तताया हुनिं थ्यंकेमफूगु पुचःया नायः राजा शाक्यं कनादिल ।
बधाई अले सम्मान ज्याझ्वः धुंकाः डल्लु आवास सांस्कृतिक पुचःया दुजपिंसं यःमरि पुन्हिया लसताय् न्ह्याका वयाच्वंगु त्यःछिंत्यः ज्याझ्वःयात थुगुसी नं निरन्तरता ब्यूगु खः । पूर्वप्रधानमन्त्री खनालया निवास पिनेसं पुचलं सांस्कृतिक न्ह्यब्वया लिसें त्यःछिंत्यः ज्याझ्वः नं न्ह्यब्वःगु खः ।
