‘विनियोजन विधेयक, २०७६ प्रस्ताव बहुमतं स्वीकृत
लहनान्युज | ने.सं. ११३९ तछलाथ्व तृतिया (६ जुन, २०१९), विहिवाः
प्रतिनिधिसभाया थौं विहिवाःया निक्वःगु मुँज्यां ‘विनियोजन विधेयक, २०७६यात बिचाः यानादिसँ’ धइगु प्रस्ताव बहुमतं स्वीकृत याःगु दु ।
अर्थमन्त्री डा. युवराज खतिवडां उगु विधेयक न्ह्यब्वयादीगु खः । उगु विधेयकयात कयाः थ्व हे जेठ २७ गतेनिसें असार ६ गतेतक सहलह जुइ ।
सभामुख कृष्णबहादुर महरां दलीय प्रतिनिधित्वया आधारय् सहलह जुइगु जानकारी बियादिल । विधेयकयात कयाः सांसदतसें न्यंगु न्ह्यसःया लिसः बियादिसें अर्थमन्त्री डा. खतिवडां कृषि ख्यःया विकासया नितिं सरकारं रासायनिक मल आयातयात थप अःपुकेत न्ह्यज्यानाच्वंगु जानकारी बियादिल ।
रासायनिक मल आयातयात व्यवस्थित दयेकेत सरकारं सरकार–सरकार (जिटुजी) अवधारणाय् ज्या यायेगु तयारी याःगु तकं वय्कलं जानकारी बियादिल ।
अर्थमन्त्री डा. खतिवडां बजेट मौलिक हक कार्यान्वयन यायेकथं तय याःगु नं जानकारी बियादिल । विधेयकयात कयाः सांसद प्रेम सुवाल, पार्वती डिसी चौधरीलिसें सांसदपिन्सं न्ववानादीगु खः ।
थ्व स्वयां न्ह्यः डा. खतिवडां ‘विनियोजन विधेयक, २०७६’, ‘राष्ट्र ऋण म्हयेगु विधेयक, २०७६’ व ‘ऋण तथा जमानत (नीस्वक्वःगु संशोधन) विधेयक, २०७६’ न्ह्यब्व्यादीगु खः ।
प्रतिनिधिसभाया मेगु मुँज्या वइगु जेष्ठ २७ गते सुथसिया ११ताः इलय् च्वनी ।
Categorized in राष्ट्रिय
