‘संक्षिप्त नेपालभाषा शब्दकोष’या समीक्षा गोष्ठी
लहनान्युज | बछलाथ्व नवमी ११३९ (मे १३ २०१९)
नेपालभाषाया कोषकार पन्नाप्रसाद जोशी (बैद्यबा)या ‘संक्षिप्त नेपालभाषा शब्दकोष’यात कयाः नेपालभाषा केन्द्रीय विभाग यलय् समीक्षा गोष्ठी जुल ।
विभागया प्रमुख प्रा.डा. ओमकारेश्वर श्रेष्ठया अध्यक्षताय् न्ह्याःगु उगु ज्याझ्वलय् प्रा.डा. तेजरत्न कंसाकार, प्रा.डा. सुन्दरकृष्ण जोशी, प्रा.डा. शीलमञ्जु जोशी, प्रा.डा. गोविन्दबोल श्रेष्ठ व सह–प्रा. काशीनाथ तमोटं ज्यापौ न्ह्यब्वयादीगु खःसा ज्यापौयात कयाः प्रा. निर्मलरत्न तुलाधर व तीर्थराज वन्तं कुलादीगु खः ।
उगु शब्दकोष ६३दँ न्ह्यःहे पिथनेगु झ्वलय् शब्दकोषया पाण्डुलिपि ज्वनाः मोटरसाइकलय् वनाच्वंगु इलय् मोटरं ठक्कर नकाः जोशीया ज्यान वंबलय् लँय् छ्यालब्याल जूगु दक्वं कःघाय् मफूगु खः ।
तःदँ लिपा यक्वहे कुतःयानाःथीथी स्रोतं पाण्डुलिपि मुंकाः पिथनेत ताःलाःगु खः ।
