‘संविधान संशोधनया मस्यौदा जिके मदु’
लहनान्यूज सम्वाददाता | कछलाथ्व षष्ठी ११३७ (नोभम्बर ६ २०१६)
संघीय समाजवादी फोरम नेपालया ल्यू नायः राजेन्द्र श्रेष्ठं नेपाल सरकारया पाखें संविधान संशोधनया खँयात कयाः छ्वयाहःगु धाःगु मस्यौदा थःके मदुगु धयादीगु दु ।
संघीय गठबन्धनया सचिवालय संयोजकया भाला तकं कुबिया च्वनादीम्ह नेता श्रेष्ठं संविधान संशोधनया मस्यौदा थःगु ल्हातय् नं दुगु धकाः पिदंगु बुखँ गलत खःगु धयादीगु खः । सामाजिक संजालया अंगलय् नेता श्रेष्ठं मस्यौदा थःके दुगु धकाः संचार माध्यमं गलत बुखँ पिकयाब्यूगु धयादीगु दु ।
सरकारयापाखें छ्वयाहःगु धाःगु मस्यौदाबारे थःत छुं हे जानकारी मदुगु श्रेष्ठं प्रष्ट यानादिल । मस्यौदाय् छुं हे कथं सहमति नं मजूनिगु नेता श्रेष्ठं जानकारी बियादीगु दु ।
थःगु नां स्वानाः मखुकथं बुखँ पिथंगु धकाः बुखँया खण्डन यासें वयकलं उगु बुखँयात प्रायोजिन, कपोलकल्पित व भ्रमं जाःगु दाबी यानादीगु दु ।
