‘सः छगू फरक अभिव्यक्ति’या झिंछगूगु श्रृंखला क्वचाल
लहनान्युज | कौलागा नवमी ११३९ (अक्टुवर २२ २०१९)
‘स छगू फरक अभिब्यक्ति’या झिंछगूगु श्रृंखला वंगु सञ्चरवाः जुल । लाःया न्हापांगु सञ्चरवाः स्वम्ह बाखं च्वमियात ब्वनाः न्ह्याका वयाच्वंगु थुगु ज्याझ्वलय् थुगुसी नेपालभाषाया नांजाःम्ह जासुसी उपन्यासकार राज साय्मि, बाखंच्वमि महेशमान डंगोल ‘लँजुवा’ व सुनील वज्राचार्यं थःथःगु बाखं न्यंकादीगु खः ।
साहित्यकार सुधीर ख्वबिं स्वांमाः क्वखाय्काः लसकुस यानादीगु ज्याझ्वलय् स्वम्हं च्वमिपिन्सं म्हतिं न्यापु न्यापु चिबाखं ब्वनाः न्यंकादीगु खः । ज्याझ्वलय् ब्वनाः न्यंकूगु चिबाखंयात कयाः साहित्यकार केदार ‘सितुं’ समीक्षात्मक टिप्पणी यानादीगु खः ।
बाखं ब्वनादीपिं व बाखं न्यनेत वःपिंमध्ये छम्हेसित गोलाप्रथाकथं रेणु श्रेष्ठयात संस्थाया सुधीर ख्वबिं मतिनाया चिं लःल्हानादिल । ज्याझ्वलय् मोक्षबहादुर अमात्यं स्वम्हं बाखं ब्वँमियात खादा क्वखाय्काः धेबा लःल्हानादीगु खः ।
