‘सरकारी कर्मचारीं राहत काये दइमखु’
नृपेन्द्रलाल श्रेष्ठ | चौलाथ्व एकादशी ११४०
येँँ महानगरपालिकां सङ्घीय सरकारं घोषण याःगु लकडाउन ई ज्वःछि असङ्गठित क्षेत्रया ज्यालादारी मजदूरत व न्हि खानाः नयेमाःपिन्त राहत इनेज्याय् न्हापांगु प्राथमिकताय् तःगु दु ।
येँ महानगरपालिकाया मेयर विद्यासुन्दर शाक्यं सरकारं उपलब्ध याकीगु रातह बालं च्वनीपिन्त जक मखसें छेँ दयाः नं न्हिथं ज्या यानाः नयेमाःपिन्त नं थुगु राहत बीगु धयादीगु खः ।
तर थुग राहत सरकारी सेवाय् ज्या याइपिं डेरावालतयसं धाःसा काये मदइगु मेयर शाक्यं स्पष्ट यानादिल ।
लहनान्यूजलिसे खँ ल्हासें मेयर शाक्यं राहत इनेज्या न्ह्याकेत महानगरपालिकां जनसङ्ख्याया आधारय् च्यागू लख, खुगू लख व प्यंगु लख तकाया दरं वडाय् धेबा निकासा यायेधुनागु जानकारी वयकलं बियादिल ।
राहत इनेबलय् दोहोरे जुइफुगु व त्वःफीफुगु संभावनाबारे लहनाया जिज्ञासाय् वयकलं धयादिल, ‘जिमिसं लक्ष्यित वर्गया प्रारम्भिक विवरण तयार यानागु दु व उकिया हे लिधंसाय् इनेज्या जुयाच्वंगु द । सुयां नं नये मखनीगु स्थिति मवयेमा धइगुलिइ जिपिं सचेत दु ।’
आःयात लकडाउन ई ज्वःछियात क्यालोरी ल्याःखानाः नसाज्वलं इनेज्या जूगु वयकलं धयादिल । वयकःया कथं राहत बीमाःपिनिगु यकिन विवरण थौंकन्हय् दुने हे ३२गुलिं वडां वइ ।
गुगु नं थासय् अत्यावश्यकीय ज्वलंया अभाव खनेदुसा ढुवानीइ सहजीकरण यानाबीगु प्रवन्ध नं महानगरपालिकं ताःलाकागु वयकलं जानकारी बियादिल ।
विपदया इलय् ग्याःचिकुया लकस मदयेकेत नं वयकलं विदेशं वःपिन्त सम्मानजनक व्यवहार यायेत नं इनाप यानादिल ।
‘विदेशं लिहावःपिं मनूतयत अपराधी थें मखु, सम्मानजनक व्यवहार यायेमाःं । इपि थः हे नं एकान्तवासय् अर्थात होम क्वारेन्टाइनय् च्वनाबीमाः । उगु इलय् वयकःपिं परिवारलिसे घुलमिल मयायेत नं जिं इनाप यानाः’ शाक्यं धयादिल ।
थ्व हे झ्वलय् सङ्क्रमणया आशङ्का दुपि मनूतयगु पहिचान व वयागु स्वास्थ्य परीक्षण सहज जुइमा धकाः महानगरपालिकां ‘कोभिड – १९ सर्भिलेन्स सर्भिस’ एप नं सञ्चालनय् हयागु खँ न्ह्यथनादिल ।
आः लकडाउनया इलय् हरेक मनूत छेँय् हे च्वनाः थः नं सुरक्षित जुया थः जःलाखला, समाज, देय् व दक्को मानव जातियात हेसुरक्षित याये धइगु भावना ब्बलनेमा धका शाक्यं कामना यानादिल ।
सर्वसाधारण नागरिकया लागिं राहत वा मेगु गुगु नं विषयस जानकारी वा ग्वाहालि कायेमाःसा महानगरपालिकाया हटलाइन ११८०इ फोन यायेत नं वयकलं इनाप यानादिल ।
